Slökkvistarfi í Grábrókarhrauni í Norðurárdal lauk um klukkan sex í morgun. Þá höfðu hátt í eitt hundrað manns, slökkviliðs- og björgunarsveitarmenn, barist við gróðurelda í hrauninu norðan við Norðurá í tæpa tólf tíma. Svæðið sem brann einkennist af úfnu hrauni; mosa- og kjarrivöxnu. Erfitt var að koma tækjum að til slökkvistarfa og þurfti því að leggja út langar slöngur fyrir vatn en einnig var notaður One-Seven froðubúnaður frá Slökkvilið Akraness og Hvalfjarðarsveitar sem sjöfaldar virkni vatnsins. Lauslega áætlað brunnu 10-15 ha lands.

Eldsins varð vart á sjöunda tímanum í gærkvöldi og var strax kallaður út tiltækur mannskapur frá Slökkviliði Borgarbyggðar auk þess sem um tuttugu manns komu til aðstoðar frá Slökkviliði Akraness og Hvalfjarðarsveitar. Síðar um kvöldið barst síðan aukin aðstoð frá Brunavörnum Suðurnesja. Að sögn Bjarna Kristins Þorsteinssonar slökkviliðsstjóra gekk slökkvistarf vel miðað við erfiðar aðstæður. „Við náðum að slökkva í síðustu glæðunum um sexleitið í morgun. Þetta var erfitt verkefni en lukkaðist vel miðað við aðstæður,“ sagði Bjarni. Aðspurður segir Bjarni að eldsupptök liggi ekki fyrir, en hann reiknar með að eldurinn hafi byrjað skammt frá Paradísarlaut.

Bjarni vill nota þetta tækifæri og benda á mikilvægi þess að ríkisvaldið komi landstórum sveitarfélögum til aðstoðar til að takast á við náttúruvá sem gróðureldar eru. „Mér finnst ríkisvaldið sýna þessu lítinn skilning. Það vantaði þó ekkert upp á að í kjölfar Mýraeldanna 2006 var blásið til ráðstefna og skýrslugerðar um viðbrögð við gróðureldum í náttúru landsins. Það skilaði hins vegar engum stuðningi til okkar sem sinnum brunavörnum og slökkvistörfum. Gróðureldar eru vaxandi náttúruvá hér á landi og geta eins og dæmin sanna blossað upp hvar sem er. Við vorum því heppin að þessi eldur var fjarri mannabústöðum,“ sagði Bjarni.

Sjá myndir frá slökkvistarfinu í gærkvöldi hér.

Slökkt var í síðustu glæðunum í Norðurárdal eftir tólf tíma baráttu