„Frjáls eins og fuglinn“ er mynda- og minningabók Mats Wibe Lund ljósmyndara. Bókin er nú komin út í nýrri útgáfu þar sem Mats hefur bætt við fjölda mynda og sett inn nafnaskrá sem vantaði í frúmútgáfu bókarinnar. Mats Wibe Lund er þekktur fyrir átthagamyndir sínar sem skreyta heimili, fyrirtæki og stofnanir um land allt. Myndirnar hafa sögulegt heimildagildi, einkum þær sem eru meira en hálfrar aldar gamlar. Bókin sem hér um ræðir var fyrst gefin út af forlaginu Skruddu í sambandi við sýninguna sem Mats hélt í Norræna húsinu haustið 2018 og vakti mikla athygli.

Menntaður í ljósmyndun í hernum

Mats fæddist í Ósló í Noregi 1937. Hann kom fyrst til Íslands sumarið 1954 og vann þá við fornleifauppgröftinn í Skálholti. Áhuga hans á Íslandi má rekja til þess tíma er faðir hans rak fyrirtæki sem var staðsett í sama húsi og sendiráð Íslands í Ósló. Ljósmyndamenntun sína fékk Mats í norska flughernum, í Frakklandi og í Þýskalandi. Hann fluttist alkomin til Íslands árið 1966 ásamt eiginkonu sinni, Arndísi Ellertsdóttur, en hafði þá margsinnis dvalist hér um lengri eða skemmri tíma. Framan af starfaði hann jöfnum höndum sem blaðamaður og ljósmyndari. Hann hefur skrifað á annað þúsund blaðagreinar um margvísleg íslensk málefni, fyrir blöð og tímarit í Evrópu og Bandaríkjunum.

Um tíma rak Mats ljósmyndaverslun og portrettstúdíó í Reykjavík, en hin seinni ár hefur hann helgað sig átthagamyndatökum úr lofti. Hann á nú mikið safn mynda, jafnt af þétttbýlisstöðum sem og af flestum sveitabýlum og eyðibýlum á Íslandi. Úr tölvuvæddu ljósmyndasafni sínu dreifir hann landkynningar- og skreytingamyndum um allan heim. Mats hefur oft sýnt myndir sínar á einkasýningum og samsýningum bæði hér heima og erlendis. Bókina Frjáls eins og fuglinn má panta beint frá höfundinum á netfanginu: mats@mats.is

Frjáls eins og fuglinn í nýrri útgafu