„Stöndum sterkari eftir þessa breytingu“

Á streymisfundi Markaðsstofu Vesturlands og Samtaka sveitarfélaga á Vesturlandi, sem haldinn var í gærmorgun, var kynnt nýtt skipurit SSV. Er það til komið vegna sameiningar Vesturlandsstofu og SSV en ætlunin er að með breytingunni megi efla samstarf stoðþjónustunnar við ferðaþjónustuna í landshlutanum, eins og fram kom í máli Páls S. Brynjarssonar, framkvæmdastjóra SSV, á fundinum.

Páll sagði frá því að SSV hefur átt allt hlutafé í Vesturlandsstofu frá árinu 2013 og oft hafi komið upp umræða um aukna samþættingu á starfi SSV og Vesturlandsstofu. Eins og áður hefur verið greint frá hætti Vesturlandsstofa rekstri upplýsingamiðstöðvar fyrir landshlutann fyrr á þessu ári. Páll sagði að það hefði að sumu leyti auðveldað breytinguna. Þyngra vægi þó vilji ferðamálayfirvalda til að reisa Áfangastaðastofur á grunni markaðsstofa landshlutanna. Við þá vinnu kom í ljós að allir landshlutar vildu halda landshlutaskiptingunni eins og hún hafði verið og verkefni áfangastaðastofanna hafa að sumu leyti verið unnin af atvinnuráðgjöf SSV.

Breytingin í skipuriti SSV felst í því að til verða ný svið innan SSV. Annars vegar fagsvið atvinnuþróunar og hins vegar fagstjóri Áfangastaðarins Vesturlands. Fagstjórarnir heyra undir framkvæmdastjóra SSV, en fagstjóri áfangastaðarins verður jafnframt framkvæmdastjóri Markaðsstofu Vesturlands. Margrét Björk Björnsdóttir verður þannig bæði fagstjóri Áfangastaðarins Vesturlands og framkvæmdastjóri markaðsstofunnar. „Breytingin á að skila aukinni skilvirkni í allri þjónustu. Hópurinn er orðinn fjölbreyttari og við teljum okkur geta boðið fjölbreyttari þjónustu og höfum til þess öflugt starfsfólk með þekkingu og hæfni til að veita þá þjónustu,“ sagði Páll á fundinum. „Einnig sjáum við fyrir okkur betri nýtingu fjármagns, aukið samráð og öflugri hagsmunagæslu. Við teljum að við stöndum sterkari eftir þessa breytingu,“ sagði Páll.

Páll Brynjarsson, framkvæmdastjóri SSV og Margrét Björk Björnsdóttir sem verður í senn fagstjóri Áfangastaðarins Vesturlands og framkvæmdastjóri Markaðsstofu Vesturlands. Á myndina vantar Ólaf Sveinsson fagstjóra atvinnuþróunar SSV. Ljósm. úr safni/ arg.

Nýtt skipurit SSV kynnt í gær