Þessa dagana er unnið við að tengja ljósleiðara inn á bæi í Hálsasveit í Borgarfirði. Þar með sjá bændur og búalið fram á breytta tíma í öllu sem viðkemur tölvusamskiptum við umheiminn eða móttöku sjónvarps- og útvarpssendinga. Þessu fagna íbúar eins og gefur að skilja og jafnvel dæmi um að slett hafi verið í form af þessu tilefni. Íbúar hafa um tíðina búið við stopult og slæmt örbylgjusamband og telja ríka ástæðu til að fagna.

„Við sveitungarnir sjáum fram á gjörbreytt og betri búsetuskilyrði og fögnum viðkunnalega internet-gaurnum, The cable guy, sem nú fer milli bæja og tengir þá hvern á fætur öðrum. Að vísu ber hann ekki birtuna til okkar í húfunni, eins og Bakkabræður forðum, heldur leggur hann rör inn í stofu fyrir ljósleiðarann og síðan er þræðinum blásið inn. Nú er hann að klára þessa vinnu á flestum bæjum og við erum alsæl,“ segir Jósefina Morell á Giljum, sem jafnramt er fréttaritari Skessuhorns.

Þetta „hár“ er endi ljósleiðarans eftir að honum var blásið inn í hús á Hofsstöðum í Hálsasveit.

Ljósið berst á bæina í Hálsasveit