Allir háskólar landsins og alls 15 framhaldsskólar hyggjast bjóða upp á sumarnám í sumar. Breiddin í námsframboði þeirra er mikil. Bæði verður hægt að taka einingarbæra áfanga sem og fjölbreytt námskeið. Sérstök áhersla verður á nám sem nýtist sem undirbúningur fyrir háskólanám, námskeið á sviði iðn- og verknáms, valkostir á sviði símenntunar og færnibrýr fyrir atvinnuleitendur sem vilja skipta um starfsvettvang. Boðið verður upp á nám sem tekur frá einni og upp í tíu vikur. Upplýsingar um námsframboð skóla verður að finna á heimasíðum þeirra en aðsókn mun ráða því hvaða námsframboð verður endanlega í boði. Þetta er meðal þess sem kom fram á fundi Lilju D Alfreðsdóttur menntamálaráðherra og Ásmundar Einars Daðasonar félagsmálaráðherra á blaðamannafundi í HR í dag. Þau kynntu aðgerðir stjórnvalda vegna sumarstarfa og sumarnáms.

Stjórnvöld ætla að ná til þess hóps námsmanna sem ekki fær starf eða aðgang að öðru úrræði í sumar og munu verja um 2,2 milljörðum kr. í átaksverkefni til að fjölga tímabundnum störfum fyrir námsmenn. Markmiðið er að með átakinu verði til 3.400 tímabundin störf fyrir námsmenn, 18 ára og eldri, sem skiptast á milli opinberra stofnana og sveitarfélaga. Um er að ræða fjórum sinnum stærra átak en ráðist var í eftir hrunið, sumrin 2010 og 2011.

Átak þetta verður unnið í samvinnu við stofnanir ríkisins og sveitarfélög og er undirbúningur þegar vel á veg kominn. Sveitarfélögin munu sjálf auglýsa störfin en Vinnumálastofnun mun auglýsa störf á vegum stofnana ríkisins. Störfin verða auglýst opinberlega á næstu dögum og þurfa stofnanir og sveitarfélög að skapa ný störf í tengslum við átakið. Miðað er við ráðningartímabilið frá 1. júní til 31. ágúst.

Þegar hafa verið staðfest 1.709 störf við sveitarfélögin, sem þau geta auglýst strax. Í byrjun næstu viku er gert ráð fyrir að Vinnumálastofnun staðfesti allt að 1.700 störf við stofnanir ríkisins sem verða auglýst í kjölfarið. Komi í ljós að þessi fjöldi sumarstarfa og annarra úrræða nái ekki til nægilega margra námsmanna verður leitað leiða til að skapa fleiri störf og/eða tryggja aðrar leiðir til framfærslu.

Ekki nægjanlegt að mati námsfólks

Landssamtök íslenskra stúdenta og Stúdentaráð Háskóla Íslands sendu í kjölfar kynningar ráðherranna frá sér ítarlega yfirlýsingu. Þar kemur m.a. fram að staða námsfólks er grafalvarleg. „Sjö þúsund horfa fram á atvinnuleysi á komandi sumri. Það eru um 40% námsmanna. Boðaðar aðgerðir um 3400 til 4400 störf eru ekki nægilega öflug viðbrögð. 87% íslenskra stúdenta vinna á sumrin og 68% íslenskra stúdenta vinna samhliða námi. Námsmenn á Íslandi geta ekki eingöngu reitt sig á námslánakerfi LÍN til framfærslu, en sjóðurinn lánar ekki fyrir fullnægjandi framfærslu. Þrátt fyrir mikla atvinnuþátttöku námsmanna og af launum þeirra sé greitt í atvinnuleysistryggingasjóð þá hefur þessi hópur ekki rétt á atvinnuleysisbótum, öryggisneti sem stendur öðru launafólki til boða,“ sagði í yfirlýsingunni.

Aðgerðir stjórnvalda vegna sumarstarfa og sumarnáms