Í morgun gekk í gildi fyrsta tilslökun takmarkana á samkomuhaldi frá 24. mars. Nú mega til dæmis 50 manns koma saman í stað 20. Sem dæmi má nú hefja starfsemi hárgreiðslustofa, safna, kvikmyndahúsa og sjúkranuddstofu, en eins og það er unnt skal gæta að tveggja metra reglunni. Matvöruverslanir og apótek eru enn undanskilin fjöldatakmörkunum. Slíkum verslunum er heimilt að hafa allt að 100 manns inni í einu að því gefnu að uppfyllt séu skilyrði um nálægðartakmörk. Í auglýsingu heilbrigðisráðherra um breyttar hömlur í samkomubanni er tekið fram að takmarkanir við fjöldasamkomum ná meðal annars til ráðstefna, kennslu, skemmtana, kirkjuathafna og annarra sambærilegra atburða þar sem fleiri en 50 koma saman. Þá verða krár, skemmtistaðir og spilasalir áfram lokaðir vegna sérstakrar smithættu. Öðrum veitingastöðum, þar sem heimilað er að selja áfengi, er sömuleiðis óheimilt að hafa opið lengur en til klukkan 23.00 alla daga vikunnar.

Sundlaugar og líkamsræktarstöðvar skulu einnig vera lokaðar almenningi áfram, vegna sérstakrar smithættu, en sundlaugar mega þó hafa opið fyrir skólasund og skipulagt íþróttastarf sem samræmist settum reglum. Æfingar og keppni skipulagðs íþróttastarfs eru sem fyrr heimilar án áhorfenda og eru snertingar óheimilar. Tveggja metra fjarlægðartakmörk gilda í skipulögðu íþróttastarfi innandyra og mega ekki fleiri en fjórir einstaklingar æfa eða leika saman í einu rými, sem skal að lágmarki vera 800 fermetrar. Við skipulagt íþróttastarf utandyra mega ekki fleiri en sjö einstaklingar æfa eða leika saman í hópi.

Forsætisráðherra talaði til þjóðarinnar

„Við verðum að vanda okkur því verkefninu er langt í frá lokið,“ sagði Katrín Jakobsdóttir, forsætisráðherra, í ávarpi til íslensku þjóðarinnar í gærkvöldi, degi áður en fyrsta skrefið var stigið í afléttingu samkomubanns. „Frá og með mánudeginum hefjum við vegferð okkar, skref fyrir skref í átt að bjartari dögum. Við skulum njóta þess og muna að ástæðan fyrir því að hægt er að taka þetta skref í að slaka á samkomubanninu er sú að við höfum staðið okkur frábærlega og náð tökum á útbreiðslu veirunnar. En við skulum samt muna að faraldurinn geisar enn um heiminn og nú tekur við erfitt uppbyggingarstarf sem mun reyna á þolinmæðina,“ sagði Katrín í ávarpi sínu og minnti á að ef við missum einbeitinguna þá getur illa farið.

Díana Carmen og Gísli voru mjög ánægð að mæta til vinnu í morgun á Rakarastofu Gísla á Akranesi. „Ég hefði ekki getað beðið eina viku í viðbót,“ sagði Gísli hress þegar blaðamaður Skessuhorns kíkti á stofuna skömmu eftir opnun í morgun. Hann segir símann varla hafa stoppað síðan hann tók úr lás og nóg verður að gera á stofunni næstu daga. Ljósm. arg.

Tilslakanir á samkomutakmörkunum gengnar í gildi