Heimilt verður að veiða í allt að fimmtán daga á Breiðafirði eftir 20. maí

Kristján Þór Júlíusson, sjávarútvegs- og landbúnaðarráðherra, hefur undirritað reglugerð um stöðvun veiða á grásleppu á þessu fiskveiðiári. Ástæðan er sú að fyrirséð er að veiðarnar muni fljótlega nálgast ráðgjöf Hafrannsóknastofnunar um að heildarafli á þessu fiskveiðiári verði ekki meiri en 4.646 tonn, sagði í tilkynningu. Grásleppuveiði í vor hefur verið betri við landið en elstu menn muna. Þannig hafa til dæmis bátar við norðaustanvert landið komið drekkhlaðnir að landi dag eftir dag, jafnvel með yfir átta tonn úr vitjun. „Hafrannsóknastofnun gaf út 4.646 tonna ráðgjöf fyrir veiðar á grásleppu á þessu fiskveiðiári. Með þessari reglugerð nú er verið að tryggja að veiðarnar verði sem best í samræmi við vísindalega ráðgjöf og það er mikilvægt fyrir alla hlutaðeigandi. Ekki síst til að tryggja að þær vottanir sem fyrir liggja tapist ekki,“ segir Kristján Þór í yfirlýsingu vegna setningar reglugerðarinnar. Kristján Þór hefur verið talsmaður þess að settur verði kvóti á grásleppuveiðar, sem byggi á veiðireynslu síðustu ára. Sjómenn halda því fram að aðferðir Hafró til að meta stofnstærð grásleppu byggi á takmörkuðum mælingum. Segja ljóst að stofninn sé mun stærri en Hafró hafi talið.

Fimmtán dagar við Breiðafjörð

Í reglugerðinni kemur fram að grásleppuveiðar verði bannaðar frá og með miðnætti aðfararnótt sunnudagsins 3. maí 2020. „Hins vegar verði heimilt að gefa út leyfi til grásleppuveiða í allt að 15 daga til þeirra sem stunduðu grásleppuveiðar árin 2018 eða 2019 á Breiðafirði, svæði 2, samkvæmt leyfum sem tóku gildi 20. maí þau ár eða síðar. Er þetta gert til að koma til móts við grásleppusjómenn sem stunda munu veiðar á þessu svæði en þær veiðar verða ekki heimilar fyrr en 20. maí næstkomandi,“ segir í reglugerðinni. Í ljósi þess að aflinn sem borist hefur að landi í vor er um eða yfir 4000 tonn, verða því um 460 tonn skilin eftir fyrir grásleppusjómenn við Breiðafjörð sem þeir hafa allt upp í 15 daga til að veiða.

Þungt högg fyrir Stykkishólm

Ljóst er að stöðvun veiða nú er reiðarslag fyrir grásleppusjómenn við allt vestan- og norðanvert landið. Þeir eru margir nýlega byrjaðir veiðar, en verða nú að draga net sín úr sjó. Þó er ljóst að takmarkaðar veiðar við Breiðafjörð gera þyngst höggið fyrir Stykkishólm. Grásleppuútgerð og hrognavinnslu þar hefur veitt um 130 manns atvinnu, enda hefur Stykkishólmur um áraraðir verið aflahæsta löndunarhöfn á landinu í grásleppu. Þessi ákvörðun ráðherra nú þýðir því gríðarlegt tekjutap fyrir sjómenn, fiskvinnslur, hafnarsjóð og Stykkishólmsbæ. Ástæða þess að veiðar á Breiðafirði hefjast ekki fyrr en 20. maí er sú að verið er að vernda æðarvarp og dúntekju.

Ráðgjöf hefur brugðist

Örn Pálsson, framkvæmdastjóri Landssambands smábátaeigenda, segir í fréttum RUV í gærkvöldi að ráðgjöf Hafrannsóknastofnunar hafi brugðist. Það sé afar óheppilegt að góður grásleppuafli verði til þess að stöðva veiðarnar. „Veiðiráðgjöfin er greinilega ekki í takti við ástand stofnsins og mögulega veiði,“ sagði Örn og bætti við að um 140 bátar hafi verið komnir til veiða. Sumir þeirra rétt nýbyrjaðir og ná því ekki nema fáum dögum á veiðum.

Grásleppuveiðar stöðvaðar vegna mikils afla fyrir norðan