Sem kunnugt er hefur sóttvarnalæknir sent heilbrigðisráðherra minnisblað þess efnis að 4. maí verði slakað á samkomubanninu úr 20 í 50 manns. Þar var jafnframt lagt til að frekari takmörkunum samkomubanns verði aflétt í skrefum á þriggja til fjögurra vikna fresti næstu mánuði á eftir. Sóttvarnalæknir hefur síðan gefið út að næsta skref yrði að víkka samkomubannið í 100 manns, hugsanlega fleiri. Ljóst er að þær kvaðir munu gera landsmönnum erfitt fyrir að fagna ýmsum hátíðum sem fyrirhugaðar voru í sumar. Undanfarið hefur enda borið nokkuð á fréttum þess efnis að bæjarhátíðir víða um land hafi verið blásnar af, en sums staðar stefna menn á hátíðarhöld með breyttu sniði. Rétt eins og hjá öðrum landsmönnum hleypir samkomubannið óvissu í fyrirhuguð hátíðarhöld á Akranesi. Gildir þá einu hvort um er að ræða sjómannadagshátíð, 17. júní eða Írska daga, sem er fjölmennasta bæjarhátíðin sem haldin er á Vesturlandi ár hvert.

Engin hátíð formlega blásin af

Ella María Gunnarsdóttir, forstöðumaður menningar- og safnamála hjá Akraneskaupstað, segir að ekki hafi verið tekin ákvörðun um hátíðarhöld í bænum á komandi sumri. „Okkur langar ótrúlega mikið að gera eitthvað, því ef það er einhver möguleiki á að gera sér glaðan dag þá viljum við gera það,“ segir Ella María í samtali við Skessuhorn. Hún kveðst þó ekki vera sérlega bjartsýn á að það verði hægt. Miðað við minnisblað sóttvarnalæknis til heilbrigðisráðherra, dagsett 19. apríl, þar sem m.a. kemur fram að frekari aflétting samkomutakmarkana verði íhuguð þremur til fjórum vikum eftir 4. maí og verði þá stefnt að 100 manna fjöldatakmörkunum, telur hún að erfitt gæti reynst að fagna sjómannadeginum og 17. júní. „Það hafa engin hátíðahöld verið formlega blásin af, en við höfum ekki enn fundið út hvernig við eigum að láta hátíðardagskrá með 100 manna fjöldatakmörkunum ganga upp. Ég sé ekki hvernig við getum skipt hátíðarsvæði upp og stýrt aðgangi að einstökum viðburðum þannig að aldrei verði meira en 100 manns á hverjum stað og aldrei minna en tveir metrar á milli manna,“ segir hún. „Ekki nema okkur dreymi einhverja brilljant lausn einhverja nóttina,“ bætir hún við í léttum dúr.

Ákvörðun tekin á næstu dögum

Enn fremur er ekkert vitað hvaða skref verða tekin í tilslökunum á samkomubanni í júní og aðdraganda Írskra daga. Ella María segir að ákvarðanir um samkomuhald á Akranesi verði teknar á allra næstu dögum. „Þar á ég einkum við sjómannadaginn og 17. júní. Þau hátíðarhöld eru nálægt í tíma og styttist í að taka þurfi ákvörðun um þau. En ég er ekki bjartsýn á að af þeim verði, miðað við 100 manna samkomubann,“ segir hún. „Síðan verður bara að koma í ljós í framhaldinu hvernig fer með Írska daga. Það er aðeins lengra í þá og mögulega hægt að taka þá ákvörðun aðeins seinna,“ bætir hún við. „Okkur langar auðvitað að geta gert okkur glaðan dag fyrstu helgina í júlí eins og á sjómannadaginn og 17. júní. Kannski getum við gert eitthvað öðruvísi, haldið færri og minni viðburði ef þörf krefur en það fer auðvitað allt saman eftir tilmælum heilbrigðisyfirvalda. Á meðan við vitum ekki hver þau verða er erfitt að segja til um hvort Írskir dagar verða haldnir eða með hvaða sniði,“ segir Ella María Gunnarsdóttir að endingu.

Óvissa um hátíðarhöld á Akranesi í sumar