Til stendur að íslenska ríkið ráðist í 100 milljóna króna kynningarátak í vor sem hefur þann tilgang að hvetja Íslendinga til að ferðast innanlands í sumar og kaupa innlenda vöru og þjónustu. Ferðamálastofu var falið að skipuleggja markaðsherferðina og ráðstafa fjármunum til kynningarátaksins. Fram hefur komið í fjölmiðlum undanfarna tvo daga að ákveðið hafi verið að einkum verði auglýst í erlendum samfélagsmiðlum og efnisveitum, svo sem Facebook og Google, en innlendir fjölmiðlar að mestu leyti sniðgengnir í auglýsingakaupum. Eins og kunnugt er greiða erlendar efnisveitur enga skatta til íslenska ríkisins fyrir seldar auglýsingar. Innlendum fjölmiðlum er hins vegar gert að innheimta 24% virðisaukaskatt af sölu auglýsinga. Við þeirri mismunun hafa íslenska stjórnvöld á engan hátt brugðist.

Morgunblaðið hefur fjallað um þetta mál á liðnum dögum. Í blaðinu í dag er haft eftir Skarphéðni Berg Steinarssyni ferðamálastjóra; „að nauðsynlegt væri að nota erlenda samfélagsmiðla í þessum tilgangi, þó að það kynni hugsanlega að skjóta skökku við að kaupa erlenda þjónustu frá fyrirtækjum sem skili engu til íslensks samfélags, þegar markmiðið er sérstaklega að hvetja landsmenn til að kaupa innlenda vöru og þjónustu,“ eins og haft er eftir Skarphéðni. Starfsemi Ferðamálastofu heyrir undir Þórdísi Kolbrúnu R Gylfadóttur ferðarmálaráðherra. Hún bakkar upp þessa ákvörðun Skarphéðins Berg og Ferðamálastofu um ráðstöfun fjármuna úr Ríkissjóði. „Ég geri enga athugasemd við að Ferðamálastofa nýti þessar leiðir eins og aðrar,“ segir ráðherrann í Morgunblaðinu í dag, en benti jafnframt á að einnig yrði auglýst í innlendum miðlum.

Þar til annað hefur verið ákveðið er það því stefna Ríkisstjórnar Íslands að setja ameríska fjölmiðla í öndvegi til að miðla efni til Íslendinga um mikilvægi þess að styðja við íslenskt atvinnulíf. Morgunblaðið hefur eftir Katrínu Jakobsdóttur forsætisráðherra í dag að engin samræmd ákvörðun hafi verið tekin um það í ríkisstjórn hvernig auglýsingum hins opinbera skuli háttað. „Það er engin skýr samræmd stefna sem hefur verið mótuð en mér fyndist það allrar umræðu vert, að taka þetta fyrir á vettvangi ríkisstjórnar,“ sagði Katrín í frétt Morgunblaðsins í dag.

Ríkið fær amerískar leitarvélar og samfélagsmiðla til að markaðssetja Ísland fyrir Íslendinga