Í morgun hófst skimun fyrir Covid-19 í Borgarnesi. Það er Íslensk erfðagreining sem býður upp á hana. Þær Rósa Marinósdóttir hjúkrunarfræðingur, Linda Kristjánsdóttir heilsugæslulæknir og Elísabet Hlín Steinþórsdóttir sjúkraflutningamaður, voru á vaktinni þegar blaðamaður Skessuhorns mætti á svæðið rétt fyrir hádegi í dag. Búið var að taka sýni úr 50 manns þegar komið var fram á tólfta tímann en skimun hófst kl. 8:30 í morgun. Ekki var annað að sjá en þær þrjár á vaktinni nytu sín í veðurblíðunni og kváðust vera himinlifandi með að vera úti að taka sýni og sögðu þetta skemmtilega tilbreytingu frá hefðbundnum vinnudegi.

135 skimanir eru á döfinni í dag og annað eins á morgun en ennþá er hægt að skrá sig í sýnatöku á morgun, þriðjudag. Fólk var ýmist að koma gangandi eða akandi til skimunar.

Pantanir fara fram í gegnum vefsíðu Íslenskrar erfðagreiningar á slóðinni: http://bokun.rannsokn.is/

Linda, Rósa og Elísabet á vaktinni við heilsugæslustöð HVE í Borgarnesi.

Linda læknir réttir hér Rósu hjúkrunarfræðingi sýni úr Maríu Erlu Geirsdóttir sem kom akandi til sýnatöku.

Skimun hafin fyrir Covid-19 í Borgarnesi