Guðmundur Franklín Jónsson, viðskipta- og hagfræðingur, hefur gefið kost á sér til embættis forseta Íslands. Þar með er hann fyrstur til að lýsa yfir mótframboði gegn sitjandi forseta; Guðna Th Jóhannessyni, sem lýst hefur því yfir að hann gefi kost á sér til endurkjörs þegar kosið verður í júní. Framboð sitt tilkynnti Guðmundur Franklín með ávarpi á Facebook síðu sinni í dag. Undanfarna daga hafa stuðningsmenn hans farið um og safnað undirskriftum til stuðnings framboðinu, en eins og kunnugt er þarf 1500 meðmælendur á landinu til að framboð sé tekið gilt.

Nokkur íhugun og mikil hvatning

Í löngu og pólitísku ávarpi sínu fer Guðmundur Franklín vítt og breitt um svið stjórnmálanna en skrifar meðal annars: „Víkjum nú að því hvers vegna ég kallaði til þessa fundar og er það vegna þess að eftir nokkra íhugun og mikla hvatningu hef ég ákveðið að bjóða mig fram til forseta Íslands. Framboð mitt mun í meginþáttum snúast um að efla forsetaembættið, nýta málskotsréttinn og leggja mitt af mörkum til að berjast gegn spillingu. Það er mikill misskilningur að hlutverk forseta Íslands einskorðist við að brosa framan í erlenda erindreka og flytja ávarp við hátíðleg tilefni. Embættið á alls ekki að vera til skrauts heldur á forsetinn að vinna með virkum hætti í þágu þjóðarinnar og leita allra leiða við að þjónusta hana og styðja. Þjóðin er hér algert lykilatriði en hvorki Alþingi né aðrir embættismenn eiga nokkurn tímann að vera teknir fram fyrir hag hennar enda eru þeir einnig í þjónustuhlutverki gagnvart henni.“

Gegn spillingu og með gagnsæi

Þá skrifar Guðmundur Franklín undir lok ávarps síns: „Ég heiti því og legg við drengskap minn að verði ég forseti mun orkupakki fjögur og fimm ekki fara í gegnum mig heldur fær þjóðin að kjósa um þá. Eins heiti ég því að ESB verði aldrei samþykkt án undangenginnar þjóðaratkvæðagreiðslu. Ég ætla mér að berjast fyrir þjóðina og hætta ekki fyrr en þjóðin fær að eiga sínar auðlindir og sinn auð sjálf. Ég ætla að tryggja að hún sé vel upplýst í öllum málum og fái að taka sem mestan þátt í málefnum sem hana varðar. Mitt framboð er gegn spillingu, með auknu gagnsæi, með beinu lýðræði og fyrir þjóðina. Þetta er það sem ég stend fyrir sem forsetaframbjóðandi og sem manneskja.“

Guðmundur Franklín býður sig fram til forseta Íslands