Úrskurðarnefnd umhverfis- og auðlindamála hefur fellt úr gildi ákvörðun Skipulagsstofnunar um að breikkun Vesturlandsvegar um Kjalarnes skuli háð mati á umhverfisáhrifum. Ógildingin er vegna formgalla, þar sem Skipulagsstofnun vísaði að mati ÚÚA í ranga lagagrein. Ákvörðunin breytir því hins vegar ekki að Vegagerðin mun ljúka umhverfismatinu, en vinna við það er á lokametrunum. Úrskurðurinn féll í kærumáli Vegagerðarinnar á hendur Skipulagsstofnun. Níu sveitarfélög á Vesturlandi höfðu einnig kært sama mál til úrskurðarnefndarinnar en nefndin vísaði þeim frá, þar sem hún taldi sveitarfélögin ekki málsaðila. Þeir einir gætu átt aðild að kærumáli fyrir nefndinni sem ættu lögvarðra hagsmuna að gæta. Umhverfisverndar-, útivistar- og hagsmunasamtök teljist þannig eiga lögvarinna hagsmuna að gæta. Sveitarfélög séu ekki samtök í skilningi laganna og njóti ekki lögfestrar kæruheimildar. Stjórnvöld hafi almennt ekki kærurétt í stjórnsýslunni.

Niðurstaðan sú sama

Þótt nefndin hafi fallist á kröfu Vegagerðarinnar um að ógilda ákvörðun Skipulagsstofnunar var það gert á grundvelli formgalla, sem fyrr segir. Í rökstuðningi nefndarinnar kemur hins vegar fram að þrátt fyrir að ákvörðunin falli óhjákvæmilega úr gildi vegna gallans sé niðurstaðan hin sama, „að mat á umhverfisáhrifum framkvæmdarinnar skuli fara fram,“ eins og segir í úrskurði nefndarinnar.

Vísir hefur eftir G. Pétri Matthíassyni, upplýsingafulltrúa Vegagerðarinnar, að búast meig við því að verkið verði boðið út í júní, að því gefnu að allt gangi upp sem snýr að umhverfismati, breytingum á deiliskipulagi og veitingu framkvæmdaleyfis. Vinna við umhverfismat sé á lokametrunum og verið sé að fara yfir athugasemdir sem bárust við frummatsskýrsluna. Skipulagsstofnun muni síðan taka sér allt að fjórar vikur til að veita álit um mat á umhverfisáhrifum.

Ákvörðun um umhverfismat felld úr gildi vegna formgalla