Frú Vigdís Finnbogadóttir fyrrum forseti Íslands fagnar í dag, 15. apríl, 90 ára afmæli sínu. Vigdís var kjörin forseti Íslands árið 1980 og gegndi því embætti í fjögur kjörtímabil, eða til ársins 1996. Vigdís varð fjórði forseti Íslands eftir lýðveldisstofnun. Hún var jafnframt fyrsta konan í heiminum sem valin var í lýðræðislegum kosningum til að gegna hlutverki þjóðhöfðingja.

Vigdís Finnbogadóttir lagði alla tíð áherslu á að vera ópólitískur forseti og forðaðist nær án undantekninga að blanda sér í deilumál á vettvangi stjórnmálanna. Í ræðu og riti lagði hún áherslu á þau gildi sem sameina fólk. Land, þjóð og tunga voru helstu hugðarefni hennar sem þjóðhöfðingja. Skógrækt og landgræðsla voru henni til að mynda hugleikin og hún var ötull talsmaður landræktar. Á ferðum sínum um landið fékk hún börn og unglinga gjarnan til liðs við sig í gróðursetningu, eins og meðfylgjandi myndir frá Brákarhátíð í Borgarnesi árið 2015 bera með sér. Þrátt fyrir að hafa þá fyrir löngu látið af embætti heiðraði hún íbúa með heimsókn og plantaði trjám í slakkann neðan við grunnskóla bæjarins.

Unga kynslóðin var Vigdísi hugleikin og í ræðum minnti hún oft á mikilvægi þess að hlúa að æskunni og hvatti þá sem eldri eru til að vera góðar fyrirmyndir. Síðast en ekki síst lagði hún áherslu á mikilvægi þess að standa vörð um íslenska tungu.

Í forsetatíð Vigdísar varð sú breyting á embættinu að starfsvettvangur forseta Íslands varð ekki nánast eingöngu innanlands eins og verið hafði, heldur ferðaðist Vigdís í mun meira mæli út fyrir landsteinana en forverar hennar í starfi höfðu gert. Henni var boðið í heimsóknir víða erlendis og hún lagði kapp á að nýta athyglina sem kjör hennar vakti í þágu lands og þjóðar. Í opinberum erindagjörðum Vigdísar erlendis voru gjarnan skipulagðir viðburðir þar sem íslensk framleiðsla var kynnt, listafólk var gjarnan með í för og íslenskir matreiðslumenn sem matreiddu úr íslensku hráefni dýrindis mat. Fram að þessum tíma hafði umfjöllun um Ísland í erlendum fréttamiðlum verið af skornum skammti og þekking umheimsins á landi og þjóð takmörkuð. Því breytti Vigdís í valdatíð sinni.

Þjóðin samgleðst með fyrrum þjóðhöfðingja sínum og góðri konu á merkum tímamótum í hennar lífi. Til hamingju Vigdís!

Vigdís Finnbogadóttir er níutíu ára í dag