Rekstur Borgarbyggðar skilaði 429 milljóna króna afgangi á síðasta ári. Ársreikningur sveitarfélagsins og undirstofnana var lagður fram á fundi sveitarstjórnar 8. apríl síðastliðinn. Rekstrartekjur A og B hluta sveitarsjóðs voru 4.457 milljónir króna, rekstrargjöld 3.844 milljónir. Rekstrarniðurstaða var því jákvæð um 429 milljónir króna á síðasta ári en árið 2018 var reksturinn sömuleiðis jákvæður þá um 501 milljón.

Rekstrartekjur A og B hluta námu 4.457 miljónum á síðasta ári, þar af námu tekjur A hluta 4.031 milljón króna. Rekstrarniðurstaða A og B hluta var jákvæð um 429 milljónir sem fyrr segir, en þar af var niðurstaða A hluta jákvæð um 404 milljónir króna skv. rekstrarreikningi. Eigið fé sveitarfélagsins í árslok nam 4.284 milljónum króna samkvæmt efnahagsreikningi A og B hluta, en eigið fé A hluta nam 4.250 milljónum. Skuldir og skuldbindingar nema 4.224 milljónum. Handbært fé frá rekstri var 591 milljón og handbært fé í árslok nam 240 milljónum króna.

„Ársreikningur fyrir árið 2019 sýnir fram á að rekstur Borgarbyggðar hefur styrkst á árinu líkt og síðustu ár sem er fagnaðarefni,“ segir í bókun meirihluta sveitarstjórnar. Þar segir að reksturinn hafi að mestu verið samkvæmt áætlun. Tekjur síðasta árs hafi aukist, sem megi fyrst og fremst skýra með hærri tekjum einstaklinga og fleiri íbúum í sveitarfélaginu. Þegar litið sé til þeirra aðstæðna sem uppi eru í dag skipti máli að sveitarfélagið standi vel og að undanfarin ár hafi verið lagt upp með að greiða niður skuldir og styrkja reksturinn. „Þessi staða gerir það að verkum að hægt er að veita viðspyrnu vegna ástandsins sem nú er uppi vegna Covid-19,“ segir í bókun meirihlutans. Þar segir að lokum að vinna við aðgerðaáætlun sé í fullum gangi í góðu samstarfi sveitarstjórnarfulltrúa þvert á flokka.

Góður rekstrarafgangur í Borgarbyggð annað árið í röð