Nú er gert ráð fyrir að fjöldatakmarkanir verði áfram á samkomur, jafnvel út þetta sumar, vegna Covid-19 faraldursins. Áfram mun fólk þurfa að halda tveggja metra fjarlægð og gæta ítrustu varkárni og tillitsemi í samskiptum, jafnvel út þetta ár. Talið er að faraldurinn sé í rénun hér á landi og hefur sóttvarnalæknir lagt á það áherslu að slakað verði á samkomubanni hægt og rólega til að koma í veg fyrir að faraldurinn blossi upp að nýju. Þá hefur hann lagt til að tilslakanir verði endurskoðaðar með þriggja til fjögurra vikna millibili. Þetta var meðal skilaboða sem sóttvarnalæknir boðaði nú um helgina. Hann lagði fram tillögur um afléttingu samkomubanns í skrefum í hendur heilbrigðisráðherra sem kynnti næstu skref á fundi með öðrum fulltrúum úr ríkisstjórn í gær. Samkomubann verður óbreytt til 4. maí næstkomandi. Þá mun hefjast aflétting bannsins í fáum en ákveðnum skrefum, að sögn Katrínar Jakobsdóttur forsætisráðherra. Svandís Svavarsdóttir kynnti að samkomutakmarkanir færu í fimmtíu manns 4. maí.

Skólahald aftur í fastar skorður

Skólastarf í leik- og grunnskólum verður með eðlilegum hætti eftir 4. maí og þá verður heimilt að opna framhalds- og háskóla að nýju. Sundlaugar og líkamsræktarstöðvar verða áfram lokaðar. Miðað verður við að hámarksfjöldi fólks í einu rými verði 50 manns, í stað 20 nú. Áfram á fjarlægð á milli fólks að vera tveir metrar eða meira. Heimilt verður að opna hárgreiðslustofur, nuddstofur, sjúkraþjálfun, snyrtistofur, söfn og sambærilega starfsemi eftir 4. maí en halda skal tveggja metra fjarlægð milli viðskiptavina eins og kostur er. Öll heilbrigðisstarfsemi sem ekki felur í sér valkvæðar skurðaðgerðir verður heimil. Tannlækningar verða sömuleiðis heimilar.

Börn mega mæta á íþróttaæfingar

Hvað íþróttastarf barna varðar þá verður það heimilt utandyra ef ekki eru fleiri en 50 saman í hóp. Þá skal vera að minnsta kosti tveggja metra fjarlægð á milli þeirra, eftir því sem unnt er, sérstaklega hjá eldri börnum. Annað skipulagt íþróttastarf verður heimilt utandyra með þeim takmörkunum að ekki mega fleiri en fjórir æfa eða leika saman, snertingar eru óheimilar og halda skal tveimur metrum á milli einstaklinga. Þá skal notkun á sameiginlegum búnaði haldið í lágmarki en annars skal sótthreinsa hann á milli notkunar.

Eins og fyrr segir verða sundlaugar og líkamsræktarstöðvar áfram lokaðar eftir 4. maí. Líkt og hingað til verður heimilt að taka á móti 100 viðskiptavinum í matvöruverslunum og lyfjaverslunum hverju sinni að uppfylltum tilteknum skilyrðum. Reglur um skemmtistaði, krár, spilasali og svipaða starfsemi verða óbreyttar og slíkir staðir því áfram lokaðir.

Fjölmenn hátíðarhöld í óvissu

Aflétting samkomubanns mun samkvæmt framansögðu eiga sér stað yfir tiltölulegan langt tímabil og því má eiga von á að stærri viðburðir og samkomur verði ekki leyfðar í sumar. Það þýðir t.d. að bæjar- og héraðshátíðir eru í óvissu, sem og fjölmenn hátíðarhöld á sjómannadag, svo dæmi sé tekið. Þá er sömuleiðis óvíst um hvort leyfilegt verður að halda fjölmenn íþróttamót, svo sem pollamót í knattspyrnu. Þessi skilaboð fela auk þess í sér óvissu um ýmsar samkomur sem áður hefur verið frestað til haustmánaðanna vegna faraldursins, svo sem fermingar. Hins vegar mun tíminn einn leiða það í ljós.

Óvissa um ferðalög milli landa

Á blaðamannafundi ríkisstjórnarinnar í dag þakkaði Svandís Svavarsdóttir heilbrigðisráðherra þríeykinu; Þórólfi, Ölmu og Víði, fyrir þeirra þátt í að halda þjóðinni upplýstri með jákvæðum en þó ákveðnum hætti alla daga. Slíkt hafi reynst ráðamönnum og þjóðinni ómetanlegt. Áslaug Arna Sigurbjörnsdóttir dómsmálaráðherra sagði allar takmarkanir sem nú eru í gildi og verða á næstu vikum byggist á að við erum að fást við heilbrigðisvá. Ræddi hún einnig takmarkanir á ferðalögum milli landa og sagði að engar tillögur þar að lútandi væru komnar fram. Þær byggðust á samstarfi við önnur ríki. Ferðatakmarkanir verða óbreyttar til og með 15. maí næstkomandi. „Ákvarðanir um ferðatakmarkanir verða aldrei teknar einhliða varðandi okkar landamæri, heldur byggir á samkomulagi milli þjóða,“ sagði Áslaug Arna. Hún sagði þorra fólks hafa brugðist við af yfirvegun og skynsemi meðan faraldurinn hefur ríkt. „Hvernig við bregðumst við mótlæti er styrkleiki okkar þjóðar,“ sagði Áslaug Arna.

Samkomuhald verður áfram í lágmarki en hömlum að hluta aflétt 4. maí