Gengið hefur verið frá samningum milli Dalabyggðar og rekstraraðila um rekstur Vínlandsseturs í Búðardal. Reksturinn munu tvenn hjón í Dölum annast í sameiningu. Það eru annars vegar þau Anna Sigríður Grétarsdóttir og Pálmi Jóhannsson og hins vegar Bjarnheiður Jóhannsdóttir og Reynir Guðbrandsson.

Í Vínlandssetrinu verður landafundasýning með hljóðleiðsögn auk veitingasölu. Verkefnið á sér nokkurn aðdraganda. Anna og Reynir rifja upp að Kjartan Ragnarsson í Landnámssetri Íslands hafi átt hugmyndina að þessari sýningu og kveikt áhuga Dalabyggðar á verkefninu fyrir nokkrum árum síðan. „Bjarnheiður var um tíma ferðamálafulltrúi í Dölum og fylgdi hún verkefninu eftir því sem það þróaðist og þekkir það út og inn. Þegar í ljós kom að vantaði rekstraraðila fyrir sýninguna sameinuðum við krafta okkar um að reka Vínlandssetrið,“ segja þau Anna og Reynir í samtali við Skessuhorn.

Sýning með hljóðleiðsögn

Landafundasýningin segir frá landafundum feðganna Eiríks rauða og Leifs heppna til forna og er byggð á Grænlendingasögu og Eiríks sögu rauða. Sýningin er byggð upp á listverkum annars vegar, en stafrænni miðlun hins vegar. Þeir listamenn sem eiga verk á sýningunni eru Aðalheiður Eysteinsdóttir, Brian Pilkington, Finnur Arnarsson, Fjölnir Bragason, Helgi Björnsson, Helgi Þorgils Friðjónsson, Ingibjörg Ágústsdóttir, Þórarinn Blöndal og Örn Sigurðsson. „Viðskiptavinir hlusta á söguna um leið og þeir ganga í gegnum sýninguna,“ segja Anna og Reynir. „Hugmyndin er svo að á kaffihúsinu verði boðið upp á morgunverðarhlaðborð, súpur, brauð og kökur bakaðar á staðnum og kaffi, en auk þess verðum við með vínveitingaleyfi. Þá verður matvara úr héraði á boðstólnum og ber þar fyrst að nefna mjólkurvörurnar héðan,“ segja þau. Þegar fram í sækir sjá þau einnig fyrir sér að standa fyrir ýmsum viðburðum og uppákomum í tengslum við sýninguna og fleira.

Framkvæmdir langt komnar

Undanfarið hafa staðið yfir framkvæmdir í húsinu, sem Anna og Reynir segja mjög langt komnar. „Ef ekkert bregður út af verður sýningin sett upp á næstu vikum,“ segja þau. „Næst á dagskrá er að fá húsið afhent en endanleg dagsetning á verklokum liggur ekki fyrir,“ segja Anna og Reynir. „Búið er að panta ýmis tæki og innanstokksmuni sem þarf fyrir reksturinn, þannig að þetta púslast hægt og sígandi saman,“ bæta þau við.

Aðspurð segjast þau ekki geta svarað til um hvenær Vínlandssetrið verði opnað. Upphaflega stóð til að opna það á sumardaginn fyrsta, en vegna ástandsins í þjóðfélaginu, samkomubanns og fleiri tilmæla, er óvíst hvenær það verður hægt. Anna og Reynir segja að opnunardagurinn sé í skoðun í ljósi veirufaraldursins, en verði sennilega ekki fyrr en í júní. Tíminn mun því leiða í ljós hvenær hægt verður að opna Vínlandssetrið.

Opnun Vínlandsseturs í Búðardal dregst væntanlega fram í júní