Horft til vesturs eftir Hvalfirði. Ljósm. Mats Wibe Lund.

Hönnun nýrrar ferðaleiðar um Hvalfjörð og Akranes

Vinna er hafin við gerð nýrrar ferðaleiðar um Hvalfjörð og Akranes. Verkefnið er samstarfsverkefni Markaðsstofu Vesturlands, Akraneskaupstaðar, Hvalfjarðarsveitar og Kjósarhrepps. Það er eitt af áfangastaðaverkefnum Vesturlands og, að sögn Thelmu Harðardóttur hjá Markaðsstofu Vesturlands, er áætlað að leiðin verði opnuð árið 2021.

„Ferðaleiðin verður mikil markaðsleg búbót fyrir svæðið og verður hönnuð bæði með íslenskan og erlendan markað í huga. Leiðin mun hafa ákveðin þemu og auðvelda ferðamönnum skipulag sitt á leiðinni. Verkefninu er ætlað að byggja upp vörumerki fyrir svæðið sem nýtist ferðaþjónum sem taka þátt í vekefninu einnig sem markaðsefni og til ímyndarsköpunar. Meðfram hönnun leiðarinnar fer fram úttekt og forgangsröðun á uppbyggingu áfanga- og áningarstaða af hálfu sveitarfélaganna,“ segir Thelma.

Ferðaþjónar á svæði ferðaleiðarinnar geta allir tekið þátt í verkefninu enda spila þeir stórt hlutverk í hönnun leiðarinnar og ákvarðanatöku. Forkrafa er að þeir séu samstarfsaðilar Markaðsstofu Vesturlands. „Þátttaka ferðaþjóna nú á byrjunarstigi verkefnisins er að koma á vinnufundi þegar fært verður að halda þá og taka þátt í könnunum og umræðum netleiðis. Við viljum eiga í góðu samstarfi við atvinnugreinina og ítrekum því mikilvægi þess að fólk skrái sig til leiks nú í upphafi vinnunnar. Við hvetjum því alla ferðaþjóna og unnendur ferðaþjónustu á Akranesi, í Hvalfirði og í Kjós að setja sig í samband við Markaðsstofu Vesturlands hafi þeir áhuga á þátttöku í verkefninu.“

Senda má fyrirspurnir á Thelmu hjá Markaðsstofu Vesturlands á: thelma@westiceland.is

Líkar þetta

Fleiri fréttir