Mikið hefur reynt á Hjálparsíma Rauða krossins frá því Coronaveiran tók að breiðast út og eftir að samkomubann var sett á. „Ráðuneytið hefur komið með aukinn stuðning inn í það mikilvæga starf sem Rauði krossinn er að sinna. Þegar eitthvað bjátar á hjá fólki hvetjum við alla til að hringja í hjálparsímann 1717. Þeir sem svara þar verða sjálfkrafa tengiliðir. Ef þeir leysa ekki sjálfir úr úrlausnarefninu vísa þeir málum áfram, ýmist til félagsþjónustu í sveitarfélögum, starfsfólks ráðuneytisins, til heilbrigðisstarfsfólks eða sálfræðinga, eftir því sem við á. Reynt er að hjálpa fólki að leysa úr þeim vandamálum sem upp koma,“ segir Ásmundur Einar Daðason félags- og barnamálaráðherra í samtali við Skessuhorn.

Vakandi gagnvart velferð barna

Þá nefnir Ásmundur að tilkynningum vegna barnaverndarmála hafi fækkað, en í því efni þurfi almenningur að vera vel vakandi. „Við erum meðvituð um þá hættu sem þetta ástand hefur í för með sér fyrir börn. Það er raunveruleg hætta á að aðstæður þeirra breytist nú þegar röskun er á öllu hefðbundu skóla- og félagsstarfi. Skólakerfið er ekki í sömu virkni og þá eru börn í aukinni hættu á heimilum þar sem til dæmis áfengisneysla eykst. Sömuleiðis vex hættan á ofbeldi. Við þessar aðstæður er mikilvægt að samfélagið allt sé meðvitað um umhverfi sitt, því við erum öll barnavernd. Ef við vitum, eða okkur grunar, um slæmar aðstæður barns, þá eigum við skilyrðislaust að vera félagslega þenkjandi og láta vita í 112. Uppbygging varnarkerfisins byggir á að samfélagið allt sé í fullri virkni. Því biðlum við til allra að hafa eyru og augu opin. Ekki sleppa því að láta vita ef grunur um eitthvað athugavert kviknar.“

Kvíði eykst

Ásmundur Einar segir að margir glími við andlega eða líkamlega erfiðleika þegar ástand sem þetta er í þjóðfélaginu og kvíði eykst. Ef vanlíðan eykst bendir hann fólki á að hika ekki við að hringja í 1717 og leita sér aðstoðar. Þangað eiga allir að geta leitað. „Ekkert mál er of lítið eða of léttvægt til að því verði ekki sinnt. Við erum að reyna það sem við getum og viljum að fólk leiti sér aðstoðar frekar en að vera eitt með sjálfu sér. Þegar hefðbundna stoðkerfið lamast vegna faraldurs af þessu tagi þá lamast allt og því þurfa allir að vera á tánum,“ segir ráðherra að endingu.

Fólk á ekki að hika við að að hringja í 1717