Á fundi sveitarstjórnar Dalabyggðar 2. apríl síðastliðinn var m.a. fjallað um tengivegi í Dalabyggð. Málið var tekið fyrir í sveitarstjórn í framhalda af því að sveitarfélaginu barst afrit af áskorun íbúa og hagsmunaaðila á Fellsströnd og Skarðsströnd til Vegagerðarinnar þess efnis að ráðast verði í úrbætur á Klofningsvegi. Sveitarstjórn samþykkti eftirfarandi: „Sveitarstjórn Dalabyggðar skorar á Vegargerðina að hefja lagningu bundins slitlags á Klofningsveg nr. 590 sumarið 2020 og skilgreina það sem tilraunaverkefni á landsvísu við að leggja bundið slitlag á malarvegi með sem minnstum hönnunarkostnaði. Klofningsvegur er lengsti samfelldi tengivegurinn í Dalabyggð og hefur um langt árabil verið sveltur varðandi fjármuni til viðhalds. Vegurinn er nauðsynleg samgönguæð í Dalabyggð og bundið slitlagið getur orðið vítamínsprauta fyrir eflingu byggðar á Fellsströnd og Skarðsströnd. Nýverið var vegurinn skilgreindur sem hluti af Vestfjarðaleið, nýrri ferðaleið um Dali, Vestfirði og Strandir. Dalabyggð er eins með til skoðunar að flytja Byggðasafn Dalamanna á Staðarfell sem stendur við veginn.“

Sveitarstjórn benti jafnframt á það í ályktun sinni að ef framkvæmdin yrði tilraunaverkefni á landsvísu væri hægt að hraða uppbyggingu slitlags á tengivegi umtalsvert en það er með öllu óásættanlegt að bíða til ársins 2090 eftir verklokum m.v. núverandi útdeilingu fjármuna, eins og segir í ályktun sveitarstjórnar.