Alþingi samþykkti á mánudaginn breytingar á ýmsum lögum til að bregðast við áhrifum heimsfaraldurs Covid-19. Aðgerðirnar sem samþykktar voru hljóða upp á tæplega 26 milljarða. Fela þær meðal annars í sér frestun á greiðslu opinberra gjalda, brúarlán til fyrirtækja og tuttugu þúsund króna skattfrjálsa eingreiðslu til öryrkja. Samtals er um að ræða 4,6 milljarða aukningu frá því sem gert hafði verið ráð fyrir í fyrstu umræðu málsins.

Af þeim sex málum sem afgreidd voru var bandormurinn svokallaði einna fyrirferðamestur. Það frumvarp kvað á um ýmsar aðgerðir til að mæta efnahagslegum áhrifum í kjölfar Covid-19 faraldursins, umræða um fjáraukalög 2020 og þingsályktun um sérstakt fjárfestingaátak.

Málin tóku nokkrum breytingum frá því sem kynnt var í fyrstu umræðu í vikunni á undan. Þá var gert ráð fyrir 21,1 milljarði en við bættust 4,6 milljarðar. Framlög til fjárfestinga hækka um tæpa þrjá milljarða og milljarði til viðbótar er veitt í heilbrigðiskerfið. Þá er gert ráð fyrir 20 þúsund króna eingreiðslu til öryrkja í sumar. Svigrúm fyrirtækja til að fresta greiðslum opinberra skatta og gjalda er aukið frekar.

Auk þess felst í lögunum markaðsátak í ferðaþjónustu, sérstakar barnabætur og örorkulífeyrir. Endurgreiðsla virðisaukaskatts til einstaklinga vegna bílaviðgerða varð að lögum. Eigendur ökutækja geta þannig fengið vaskinn endurgreiddan að fullu vegna viðgerða að verðmæti 25 þúsund krónur eða meira. Endurgreiðsluheimildin nær þó ekki til smáviðgerða, smurþjónustu eða hjólbarðaviðgerða, sem kosta minna. Tímabundin úttekt á séreignarsparnaði er heimilið og lögum um ríkisábyrgðir og Seðlabanka Íslands breytt til að auðvelda viðbótarlán lánastofnana til fyrirtækja.

Samþykktu 26 milljarða aðgerðapakka