Karlmaður var nýverið í Héraðsdómi Vesturlands sakfelldur fyrir nytjastuld ökutækis og umferðalagabrot. Var honum gert að sæta 60 daga fangelsi og sviptur ökurétti í 15 mánuði.

Manninum var gefið að sök að hafa tekið bíl í heimildarleysi við Kirkjubraut á Akranesi 2 í október 2019, ekið um götur bæjarins, um Akrafjallsveg og Vesturlandsveg þar til lögregla hafði afskipti af honum. Ók maðurinn á allt að 184 km hraða á klukkustund, þar sem leyfilegur hámarkshraði er 90 km/klst, í óökuhæfu ástandi sökum áhrifa ávana- og fíkniefna. Bæði amfetamín og kókaín mældust í blóði mannsins. Hann sinnti ekki fyrirmælum lögreglu um að stöðva akstur og á endanum velti hann bifreiðinni við afleggjarann að Melahverfi í Hvalfjarðarsveit.

Maðurinn játaði brot sín og er jatning hans studd sakargögnum. Samkvæmt sakavottorði hafði hann áður verið dæmdur í tveggja ára skilorðsbundið fangelsi 25. september 2017 fyrir tilraun til manndráps. Var honum gert að afplána þá refsinum með úrskurði í júní 2018 eftir brot á skilorði. Hann var dæmdur í sex mánaða fangelsi 2. maí 2019 fyrir rán og brot á tollalögum og lögreglulögum. „Hinn 10. október 2019 var ákærða veitt reynslulausn í tvö ár á 389 daga eftirstöðvun fangelsisrefsingar. Þau brot sem ákærði hefur nú verið sakfelldur fyrir voru framin 2. október 2019 og telst hann því ekki hafa rofið skilyrði reynslulausnarinnar. Samkvæmt því og að virtum brotum ákærða þykir refsing hans hæfilega ákveðin fangelsi í 60 daga,“ segir í úrskurði héraðsdóms. Auk þess var maðurinn sviptur ökuréttindum í 15 mánuði og gert að greiða allan sakarkostnað og þóknun verjanda síns.

Skaðabótakröfu vísað frá

Félagið Veislur og viðburðir ehf. lagði fram einkaréttarkröfu í málinu, um greiðslu tveggja milljóna króna skaðabóta frá manninum, en til vara að viðurkenndi yrði með dómi skaðabótaskylda mannsins vegna tjóns félagsins af völdum refsiverðrar háttsemi hans.

Dómurinn taldi skaðabótakröfu félagsins vanreifaða. Ekki lægi fyrir nein staðfesting á greiðslu sem félagið kvaðst hafa þurft að greiða til bílaleigu sem eiganda bifreiðarinnar, mat á verðmæti bifreiðarinnar né gögn um uppboðssölu bifreiðarinnar sem vísað hafði verðið til og uppgjörs vegna hennar.Taldi dómurinn fjárhæð bótakröfu því svo vanreifaða að ekki væri unnt að dæma manninn til greiðslu skaðabótafjárhæðar. Hins vegar viðurkenndi dómurinn sakaðbótaábyrgð mannsins vegna þess fjártjóns sem Veislur og viðburðir kynnu að hafa orðið fyrir vegna brota hans, en vísaði bótakröfunni að öðru leyti frá dómi.

Dæmdur fyrir ofsaakstur undir áhrifum á stolnum bíl