Íslandspóstur býður nú upp á að dreifingu matvæla og annarrar dagvöru í sveitir landsins. Með þessu er fyrirtækið að svara mikilli eftirspurn sem verið hefur eftir heimsendingu frá viðskiptavinum sem búa í sveitum en eftirspurn hefur vaxið mikið að undanförnu, segir í tilkynningu.

Pósturinn hefur verið að sinna matvæladreifingu á nokkrum svæðum og hefur nú hafið samvinnu við Hlíðarkaup á Sauðárkróki en Pósturinn hefur hug á að sinna samskonar dreifingu víðar á landinu til að þjónusta sveitir sem allra best. „Það er mikilvægt að Pósturinn sé lausnamiðaður og tilbúinn að svara síbreytilegum þörfum viðskiptavina hratt og örugglega á sveigjanlegan hátt. Heimsendingarþjónusta á matvöru, líkt og öðrum vörum, verður stór hluti af dreifikerfi framtíðarinnar og Pósturinn leggur mikla áherslu á að vera til staðar fyrir alla landsmenn og veita öfluga dreifingarþjónustu allt landið um kring.“

Þá segir að þörfin hafi í raun aldrei verið meiri á dreifingu á almennum dagvörum í sveitir. „Það má segja að við séum að bregðast við því ástandi sem hefur skapast. Það er okkur almennt mjög mikilvægt að veita frábæra þjónustu í sveitum en nú sem aldrei fyrr sjáum við mikla þörf á að hlúa enn betur að viðskiptavinum okkar í sveitum landsins. Staðan er einfaldlega þannig í dag að við erum að upplifa einstaka tíma í þjóðfélaginu. Við lítum svo á að það sé ekki nóg að horfa einungis á þéttbýlissvæði landsins, við þurfum að horfa til allra og sinna alhliða dreifingarþjónustu. Það er nokkuð ljóst að sú staða getur komið upp að fólk verði fast heimavið í sveitum líkt og þéttbýli og því mikilvægt að dagvara skili sér heim að dyrum. Við ætlum okkur svo sannarlega að vera sterkur hlekkur í öflugu kerfi sem tekst á við breytta tíma að samheldni, festu og krafti og fögnum tækfærinu til að sinna samstöðu í verki. Að því sögðu þá horfum við á þessa þjónustu til langs tíma, þó hún nýtist vissulega vel í dag eru munu heimsendingar á matvælum vaxa og verða enn mikilvægari þjónustuþáttur hjá okkur til framtíðar, bæði í þéttbýli og sveitum landsins,“ segir Elvar Bjarki Helgason, forstöðumaður söludeilar Póstsins.