Ávísanir til landsmanna vegna ferðalaga innanlands, kröftugt alþjóðlegt markaðsátak og afnám gistináttaskatts út næsta ár eru meðal þeirra aðgerða í þágu íslenskrar ferðaþjónustu vegna COVID-19 sem ríkisstjórnin kynnti á laugardag. Stjórnvöld vilja leggja kapp á að Ísland verði með fyrstu löndum til að byggja aftur upp eftirspurn í ferðaþjónustu. Í því skyni er þegar hafinn undirbúningur að kröftugu alþjóðlegu markaðsátaki í samvinnu við Íslandsstofu.

Meðal annars er lagt til að stjórnvöld, ferðaþjónustan og almenningur þurfi að taka höndum saman um að auka ferðalög innanlands. Í þeim tilgangi hefur ríkisstjórnin ákveðið að gefa landsmönnum 1,5 milljarða króna til að verja til ferðalaga innanlands. Átakið verður útfært nánar í samráði við Samtök ferðaþjónustunnar. Þá verður gistináttaskatturinn afnuminn út næsta ár, til ársloka 2021.

Þessar þrjár aðgerðir fela í sér alls 4,6 milljarða innspýtingu til ferðaþjónustunnar. Auk þess hefur Þórdís Kolbrún R Gylfadóttir ferðamálaráðherra þegar breytt reglugerð um tryggingafé fyrir ferðaþjónustuaðila, sem liðkar verulega fyrir greininni. Þá hefur Isavia fellt niður notendagjöld á Keflavíkurflugvelli í viðleitni til að örva flugframboð.

Síðast en ekki síst munu almennar aðgerðir í þágu atvinnulífsins ekki síst nýtast ferðaþjónustunni. Þar er m.a. um að ræða greiðslur frá ríkinu til að mæta tekjutapi starfsfólks sem lækkar í starfshlutfalli; ríkisábyrgð á hluta útlána til fyrirtækja í rekstrarvanda; greiðslur til starfsmanna í sóttkví og frestun á greiðslu opinberra gjalda fram á næsta ár.

„Með þessum stórfelldu aðgerðum veitum við aukið súrefni til atvinnulífsins og mildum áhrifin á fólk og fyrirtæki í ferðaþjónustu. Samtímis búum við okkur undir viðsnúninginn og verðum tilbúin að sækja kröftuglega fram á erlendum mörkuðum þegar aðstæður leyfa,“ segir Þórdís Kolbrún í yfirlýsingu vegna aðgerða sem beinast að ferðaþjónustunni.

Aðgerðir í þágu ferðaþjónustu sérstaklega