Veitingahúsin Narfeyrarstofa og Sjávarpakkhúsið í Stykkishólmi hafa tekið höndum saman og hafa opið á víxl aðra hverja viku. Þetta er gert í hagræðingarskini meðan lítið er af ferðafólki og þannig reynt að bregðast við því fordæmalausa ástandi sem nú ríkir. Fjöldi starfsfólks á veitingastöðunum er nú í lágmarki. Þessi ráðstöfun gerir það að verkum að báðir staðirnir geta haldið áfram starfsemi þótt í smærra umfangi sé.

Því má við þetta bæta að nánast allar bókanir hótelgesta á stærstu hótel bæjarins hafa verið afbókaðar undanfarna daga. Framkvæmdir standa nú yfir við stækkun Hótel Stykkishólms. Þær munu halda áfram og lögð áhersla á að þeim verði lokið þegar sjá fer að nýju til sólar í ferðaþjónustunni hér á landi.

Sjávarpakkhúsið.

Hafa opið til víxl á veitingastöðunum