Sú spurning hefur vaknað hvort einhverjar reglur séu í gildi hér á landi um hvort heimilt sé að dvelja í sumarhúsum meðan fólki er gert að vera í sóttkví vegna Covid-19 veirunnar. Í almennum reglum um sóttkví, sem lesa má um á covid.is segir m.a.: „Einstaklingur í sóttkví á að halda sig heima við og hafa bein samskipti við sem fæsta einstaklinga.“ Þá ber fólki að láta heilsugæslustöð vita um dvalarstað sinn. Í reglum um sóttkví er hins vegar ekki tekið fyrir að fólk megi dvelja í sumarhúsum meðan sóttkví stendur, fylgi það að öðru leyti þeim reglum sem gilda. Þar á meðal er bannað að fara í verslanir.

Norðmenn setja strangar reglur

Á undanförnum dögum hefur fjölgað gríðarlega í sumarhúsum, t.d. í Borgarfirði og á Suðurlandi. Í þeim hópi er fólk sem ýmist er í sjálfskipaðri sóttkví eða gert að sæta henni. Í Noregi hafa þarlend stjórnvöld gengið skrefinu lengra en Íslendingar og sett strangar reglur. Er nú öllum þeim sem eru með bústað utan þess fylkis í Noregi sem þeir eru með lögheimili sitt, gert að fara heim til sín og taka út sína sóttkví þar. Svo rammt hefur kveðið að þessu að t.d. í Hallingdal í Noregi hefur verið óskað aðstoðar heimavarnarliðsins til að vísa fólki úr bústöðum sem ekki vill fara úr þeim sjálfviljugt. Þetta er meðal annars gert til að heilbrigðisstofnanir á hverjum stað séu mannaðar í samræmi við þann íbúafjölda sem þar hefur fasta búsetu, en ekki jafnvel þúsundir manna í duldri búsetu sem þarf eðlil málsins samkvæmt læknisþjónustu í hlutfalli við það.

Sem fyrr segir er ekkert sem bannar Íslendingum að dvelja í sumarhúsum hér á landi á meðan sóttkví stendur, að því gefnu að það vari að öðru leyti eftir reglum sem um sóttkví gilda. Sjá nánar leiðbeiningar um sóttkví í heimahúsum af vef covid.is:

Dvöl í sumarhúsum hefur aukist til muna