Lögreglan á Vesturlandi hefur gripið til ýmissa ráðstafana vegna COVID-19 faraldursins. Enginn samgangur er á milli lögreglustöðvanna sex í umdæminu. Þar að auki hefur stöðinni á Akranesi verið skipt upp í tvö hólf og ekki er samngangur þar á milli. Yfirlögregluþjónn og aðstoðaryfirlögregluþjónn munu skiptast á að vinna heima, viku í senn, næstu vikurnar. Ásmundur Kr. Ásmundsson aðstoðaryfirlögregluþjónn var einmitt heima að vinna þegar Skessuhorn ræddi við hann í gær. „Við erum að reyna að tryggja að við getum alltaf verið með órofinn rekstur, komi til þess að lögreglumenn smitist, því við þurfum alltaf að gera út lögreglu,“ segir Ásmundur. „Það er gott að geta leyst til dæmis mitt starf og yfirlögregluþjóns þannig að við vinnum heiman frá okkur til skiptis, viku og viku. En svo fer ég út á vakt á lögreglubíl ef þannig ástand skapast og við missum menn í sóttkví eða veikindi. Þá fara yfirmennirnir út. Við erum þannig hálfgert varalið, því grunnlöggæslan getur ekki hætt, það verða alltaf einhverjir að vera úti á bílunum,“ segir hann.

Hann segir að eitt og annað í daglegu starfi lögreglu hafi tekið á sig breytta mynd. Við umferðareftirlit, þegar höfð eru afskipti af fólki, er talað við það á meðan það situr í eigin bíl og reynt að halda ákveðinni fjarlægð samkvæmt tilmælum á meðan samtalinu stendur. „En haldið er uppi allri frumkvæðislöggæslu engu að síður. Við erum að fygljast með umferðarhraða og öðru eins og vanalega,“ segir Ásmundur.

Geta sótthreinsað bílana

Auk þess segir Ásmundur að búið sé að koma upp sótthreinsiaðstöðu fyrir lögreglu- og sjúkrabíla að Þjóðbraut 13 á Akranesi, í hluta þess rýmis þar sem Vínbúðin var áður til húsa. Lögreglan hefur fengið það rými og framundan er stækkun lögreglustöðvarinnar. „Þar bætast 280 fermetrar við og stefnan er að stækka stöðina á Akranesi. Það verður kærkomið, því í dag er ekki fullnægjandi búnings- eða sturtuaðstaða á stöðinni og ýmislegt sem vantar upp á,“ segir hann.

Lögregla hefur ekki fengið húsnæðið afhent, en Ásmundur segir að stjórnendur Vínbúðarinnar hafi tekið vel í að lána lögreglunni húsið þegar í stað til að koma upp sótthreinsiaðstöðu til bráðabrigða. „Búið er að útbúa rými þannig að hægt er að keyra sjúkra- eða lögreglubíla inn, loka á eftir og hefja sótthreinsun bíla og eftir atvikum biðtíma viðkomandi lögreglu- eða sjúkraflutningamanna,“ segir hann. „Við erum þannig með húsnæðið í láni en fáum það svo afhent seinna,“ segir Ásmundur að endingu.

Enginn samgangur milli lögreglustöðva