Samkomubann vegna COVID-19 faraldursins hefur óhjákvæmilega töluverð áhrif á starfsemi Heilbrigðisstofnunar Vesturlands. Aðgangur að heilsugæslustöðvum, göngudeildum, sjúkrahúsum og hjúkrundardeildum HVE hefur verið skertur. Takmarka þarf sem mest fjölda á biðstofu hverju sinni og gæta þess að minnst tveir metrar séu á milli þeirra sem þar bíða. Á það við um alla sem koma til viðtals, í blóðprufur, skoðanir og rannsóknir á starfstöðvum HVE um landshlutann allan. Aðstandendur eru beðnir að koma ekki með skjólstæðingum í viðtöl og skoðanir nema slíkt sé nauðsynlegt. Heimsóknir eru ekki leyfðar á legu- og hjúkrunardeildir nema í algerum undantekningartilvikum.

Fæðandi konur geta aðeins haft með sér einn aðstandanda og eru engar undantekningar gerðar frá því. Ekki er leyfilegt að aðstandendur fylgi skjólstæðingum sem koma í bókaða tíma eða bráðakomur á kvennadeild. Á þetta einnig við um komur í meðgönguvernd og fósturgreiningu. Heimsóknir eru ekki leyfðar á kvennadeild nema í sérstökum undantekningartilvikum. „Þetta er mikil breyting á starfseminni. En sem betur fer búum við svo vel á Íslandi að eiga góða forystu í þessu máli hjá almannavörnum, sem heldur reglulega upplýsingafundi til að miðla upplýsingum. Utanumhaldið er mikið og gott,“ segir Jóhanna Fjóla Jóhannesdóttir, forstjóri HVE, í samtali við Skessuhorn.

Verja þá sem eru viðkvæmir

Hún segir að starfsfólk og stjórnendur HVE hafi verið búnir að vinna að undirbúningi samkvæmt viðbragðsáætlun en síðan bættist samkomubann við sem kallaði á aukin viðbrögð. „Viðbúnaður á HVE snýr auðvitað ekki bara að þeim sem koma inn heldur líka að skipulagi innanhúss, til dæmis að fjarlægð milli starfsmanna sé eins og tilskipunin gerir ráð fyrir. Við erum til dæmis ekki með neina fundi innan stofnunarinnar og ef við þurfum að hittast gætum við að þessari tveggja metra lágmarksfjarlægð,“ segir hún. „Í staðinn höfum við tekið upp meiri fjarsamskipti. Síminn er góður og við notum hann mikið, bæði okkar í millum og í þjónustu heilsugæslu. Það er ýmislegt sem má leysa í gegnum síma,“ bætir hún við en tekur skýrt fram að önnur tilvik komi eftir sem áður á HVE. „Þeir sem verða veikir koma eftir sem áður til okkar,“ segir hún. „En okkar hlutverk er alltaf að verja þá sem eru viðkvæmir og sjúklingana sem liggja inni. Það hefur gengið vel. Tilmælum um þessar takmarkanir á heimsóknum hefur verið mjög vel tekið og mér finnst allir vera að leggjast á eitt til að komast í gegnum þetta tímabil,“ segir Jóhanna Fjóla.

Handþvottur besta vörnin

Faraldrinum hefur óhjákvæmilega fylgt aukið álag á starfsfólk HVE, með miklu breytingum á skömmum tíma ofan á annað daglegt starf stofnunarinnar. „Hér eru allir að gera sitt besta og leggja aukalega á sig, alveg eins og landsmenn allir,“ segir forstjórinn. „Við erum í raun að vinna eftir sömu leiðbeiningum og almenningur. Heilbrigðisstarfsfólk hefur alltaf verið mjög meðvitað um mikilvægi handþvottar og sprittnotkunar og hefur aukið við þar núna eins og aðrir landsmenn,“ segir forstjórinn og vill ítreka mikilvægi hreinlætis, handþvottar og sprittnotkunar við almenning. „Það er öflugasta vörnin gegn veirunni,“ segir hún og vill einnig benda fólki á vefinn www.covid.is til að leita upplýsinga. „Ég vil leggja áherslu á að fólk noti www.covid.is til að leita sér upplýsinga því það getur létt því mikla álagi sem er á símaþjónustu heilsugæslustöðva varðandi fyrirspurnir. Þar eru mjög góðar upplýsingar og leiðbeiningar eru eru uppfærðar eftir þörfum,“ segir Jóhanna Fjóla Jóhannesdóttir að endingu.

Töluverð áhrif á starfsemi HVE