Starfsfólk allra grunnskóla í landinu stóð í morgun fyrir þeirri áskorun að skipuleggja skólastarf næstu vikna út frá ákveðinni forskrift, út frá gjörbreyttum veruleika í kjölfar þess að yfirvöld ákváðu á föstudaginn að leik- og grunnskólar starfi áfram þrátt fyrir Covid-19 faraldurinn. Helsta áskorun skólafólks felst í að einangra nemendur og starfsfólk í smærri hópa, því eins og kom fram í tilmælum yfirvalda er gert ráð fyrir að hópar verði að einhverju eða öllu leyti aðgreindir hver frá öðrum til að lágmarka smithættu komi veikin upp í hópi nemenda eða starfsfólks. Skipulagsdagar voru því í skólum víðast hvar í dag. Grundaskóli á Akranesi er stærsti grunnskólinn á starfssvæði Skessuhorns, með á sjöunda hundrað nemendur í tíu árgöngum. Sigurður Arnar Sigurðsson skólastjóri var spurður um hvernig skipulag skólahalds verður á næstu dögum og vikum.

Tíu sjálfstæð teymi

„Hér hefur skólabyggingu Grundaskóla verið skipt upp í einingar eða sóttkví þannig að engin krosstengsl eiga að verða á milli árganga. Einnig er öllu starfsfólki skipt upp í tíu sjálfstæð teymi sem sinna hvert einum árgangi. Þannig reynum við að tryggja að ef veiran kemst að einum hópi, sem þarf þá hugsanlega að hætta skólasókn, halda hinir níu hóparnir áfram,“ segir Sigurður Arnar. „Við þessar aðstæður er eðlilega ekki hægt að halda uppi hefðbundnu skólastarfi. Það verður því með gjörbreyttu sniði og takmarkað næstu daga og vikur. Á meðan á neyðarstigi Almannavarna stendur er engu að síður verkefni okkar allra að halda börnum og ungmennum virkum, bæði andlega og líkamlega. Kennarar Grundaskóla og annað starfsfólk mun gera sitt besta til þess að skóla- og heimanám nemenda verði eins markvisst og árangursríkt og aðstæður leyfa. Hver árgangur skólans hefur nú undirbúið slíka sviðsmynd og úrlausnirnar eru margar og mismunandi allt eftir aldri nemenda og þroska,“ segir Sigurður Arnar.

Þrátt fyrir allt bjart framundan

Aðspurður segir Sigurður Arnar að gripið verði til neyðaráætlunar skólans sem er blanda skólasóknar og heimanáms. „Hver skóladagur verður frá klukkan 8 til 12. Frístund verður opnuð kl. 13 og heldur úti þjónustu til kl. 16:15. Við sendum svo út töflu sem segir hvenær einstakir árgangar eiga að mæta í skóla. Fylgt er svokölluðu rúllukerfi þannig að hver árgangur er í skólanum tvo daga af hverjum sex. Reynt er að mæta þeim yngstu með því að tryggja nemendum í 1. bekk þjónustu í Frístund þrjá daga á móti skóla og nemendur í 2. bekk tvo daga,“ segir Sigurður Arnar. Engin kennsla fer fram í íþróttahúsinu að Jaðarsbökkum næsta mánuðinn.

„Nú sem aldrei fyrr er mikilvægt að skólafólk og foreldrar vinni vel saman og skapi sterka liðsheild. Þetta óvissuástand mun sem betur fer ganga yfir og þrátt fyrir allt þá er bjart framundan,“ segir Sigurður Arnar Sigurðsson skólastjóri Grundaskóla.

Skipulag grunnskólastarfsins gjörbreytt og tekur mið af aðstæðum