Eins og greint hefur verið frá í Skessuhorni voru fyrr í mánuðinum kynntar tillögur átakshóps um úrbætur í innviðum. Fela þær meðal annars í sér að flýta jarðstrengjavæðingu raforkukerfisins að langmestu leyti til 2025 í stað 2035 og flýta framkvæmdum við svæðisflutningskerfi raforku sem ekki eru á tíu ára kerfisáætlun. Einnig að varaafl fyrir raforku verði endurskilgreint og eflt. Þá verður þrífösun rafmagns innleidd samhliða jarðstrengjavæðingu kerfisins, en áætlað er að truflunum í dreifikerfi muni fækka um 85% með jarðstrengjavæðingu.

„Snæfellsnesið undanskilið í heild“

Í greinargerð Landsnets með tillögunum má sjá að nokkrir staðir eru ekki inn á fjárfestingaáætlun Landsnets til næstu tíu ára, þar af fimm þar sem varaafl dugar ekki fyrir forgangsálagi þurfi að grípa til þess. Þeir staðir eru Snæfellsnes, Húsavík, Prestbakki (Kirkjubæjarklaustur), Kópasker og Vestmannaeyjar. Í greinargerðinni segir að framkvæmdir sem eigi að auka afhendingaröryggi þessara staða séu á langtímaáætlun Landsnets. Þær hafi hins vegar ekki verið tímasettar. Til að laga megi ástand þessara staða er áætlað að þurfi að framkvæma fyrir 8-10 milljarða til viðbótar við núverandi áætlun. Tvítenging Snæfellsness við meginflutningskerfið fellur þar undir. „Snæfellsnesið er eina heila landsvæðið á Íslandi þar sem Landsnet ætlar ekki að tengja með N-1 hringtengingu á næstu árum. Hinir staðirnir eru þéttbýliskjarnar, en Snæfellsnesið er undanskilið í heild og þar með auðvitað öll byggð á Nesinu, hvort sem er í þéttbýli eða dreifbýli,“ segir Jakob Björgvin Jakobsson, bæjarstjóri í Stykkishólmi, í samtali við Skessuhorn.

Nánar er rætt við bæjarstjórann í Skessuhorni vikunnar.

„Fráleitt að láta heilt landsvæði sitja á hakanum“