Miðvikudagana 11. og 25. mars næstkomandi stendur bókasafn Safnahússins í Borgarnesi fyrir tvenns konar ritsmiðjum í umsjón Sunnu Dísar Másdóttur. Hún er sjálfstætt starfandi bókmenntagagnrýnandi, ritlistarleiðbeinandi og skáld. Hámarksfjöldi þátttakenda er 15 og aðgangur er ókeypis.

Ritsmiðjan miðvikudaginn 11. mars verður klukkan 19:20-22:30 og nefnist „Að skrifa lífið.“ Þar er um að ræða fræðandi smiðja um ævisögur, sjálfsævisögur, skáldævisögur og gráu svæðin þar á milli – hvað felst í því að skrifa um eigið líf eða annarra? Lesin verða brot úr ævisögum og gerðar stílæfingar sem veita innblástur til eigin skrifa.

Á seinni ritstmiðjunni miðvikudagur 25. mars kl. 19.20 – 22.30 verður viðfangsefnið „Örsögur.“ Það ver smiðja fyrir fólk sem vill liðka skrifvöðvana og komast í gang. „Varúð: Það er alltof skemmtilegt að skrifa örsögur og nokkur hætta á því að ánetjast iðjunni! En hvað er örsaga? Skoðuð verða nokkur dæmi um þetta skemmtilega bókmenntaform, gerðar verða stílæfingar og æfingar í að skrifa örsögur,“ segir í kynningu.

Skráning í smiðjurnar er fyrirfram, hjá Sævari héraðsbókaverði í síma 433-7200 eða á: bokasafn@safnahus.is.

Auk ofangreindra viðburða verður boðið upp á fróðleik fimmtudagskvöldið 12. mars þar sem Aldís Arnardóttir listfræðingur flytur fyrirlestur um Ásgerði Búadóttur sem var brautryðjandi á sviði listvefnaðar á Íslandi. Aldís er sýningarstjóri sýningarinnar Ásgerður Búadóttir – Lífsfletir sem nú stendur yfir á Listasafni Reykjavíkur, Kjarvalsstöðum. Fyrirlesturinn er á fagsviði Listasafns Borgarness. Hann verður á efri hæð Safnahúss, gengið inn um aðalinngang. Framsagan tekur um klukkutíma, svo verður spjallað og heitt á könnunni.

Sjá nánar um viðburði á: https://safnahus.is

Ritsmiðjur framundan í Safnahúsi