Í gær var við messu í Dómkirkjunni í Reykjavík vígðir tveir prestar til starfa hjá Þjóðkirkjunni og tveir djáknar. Þeirra á meðal hlaut vígslu séra Þóra Björg Sigurðardóttir verðandi prestur í Garða- og Saurbæjarprestakalli. Það var séra Agnes M. Sigurðardóttir biskup yfir Íslandi sem framkvæmdi vígsluna og sr. Elínborg Sturludóttir þjónaði fyrir altari.

Þóra Björg Sigurðardóttir er fædd í Reykjavík 1989. Hún lauk prófi í guðfræði frá Háskóla Íslands árið 2019 og BS-prófi í sálfræði frá sama skóla 2016. Hún hefur starfað sem ritari og æskulýðsfullrúi við Grafarvogskirkju frá árinu 2011 en komið að kristilegu starfi frá árinu 2008 m.a. á vegum KFUM og KFUK í Vatnaskógi og Ölveri. Hún er gift Geirlaugi Sigurbjörnssyni. Þau eiga tvö börn og eru búsett á Akranesi. Auk séra Þóru Bjargar var sr. Jónína Ólafsdóttir ráðin til starfa við Garða- og Saurbæjarprestakall, en hún er nú að ljúka störfum sem prestur á Dalvík. Þær Þóra Björg og Jónína munu báðar hefja störf 1. apríl næstkomandi og þjóna við hlið séra Þráins Haraldssonar sóknarprests. Þóra Björg mun leggja áherslu á barna- og æskulýðsstarf í sókninni.

Fremsta röð frá vinstri: sr. Þóra Björg Sigurðardótitr, sr. Pétur Ragnhildarson, sr. Agnes M. Sigurðardóttir biskup, Jóhanna María Eyjólfsdóttir djákni, Anna Hulda Júlíusdóttir djákni, og þá miðröð frá vinstri: Sr. Arna Ýrr Sigurðardóttir, dr. Arnfríður Guðmundsdóttir, sr. Karl V. Matthíasson, Þórey Dögg Jónsdóttir djákni, Rósa Kristjánsdóttir djákni, sr. Elínborg Sturludóttir. Aftasta röð: sr. Henning Emil Magnússon, sr. Þráinn Haraldsson, sr. Guðmundur Karl Ágústsson og sr. Sigurður Jónsson. Ljósm. kirkjan.is

Prestar vígðir til starfa