Eyrarrósin, viðurkenning fyrir framúrskarandi menningarverkefni utan höfuðborgarsvæðisins, var veitt í sextánda sinn við hátíðlega athöfn á Bessastöðum í gær. Verðlaunin komu í hlut Skjaldborgar – Hátíðar íslenskra heimildamynda á Patreksfirði. Aðstandendur hátíðarinnar voru að vonum hæstánægðir þegar þær tóku á móti viðurkenningunni og verðlaunafé, enda í þriðja sinn sem hátíðin kemst á Eyrarrósarlistann.

Alls bárust 25 umsóknir um Eyrarrósina 2020 hvaðanæva af landinu og voru sex verkefni valin á Eyrarrósarlistann í ár. Það voru Júlíana – hátíð sögu og bóka í Stykkishólmi, Kakalaskáli í Skagafirði, menningarstarf í Alþýðuhúsinu á Siglufirði, Plan B Art Festival í Borgarnesi, Reykholtshátíð í Borgarfirði auk Skjaldborgar á Patreksfirði.

Í umsögn dómnefndar segir: „Skjaldborg – hátíð íslenskra heimildamynda er kraftmikil uppskeruhátíð heimildamyndafólks og eina íslenska kvikmyndahátíðin sem sérhæfir sig í að frumsýna íslenskar heimildamyndir. Reynsluboltar í faginu, byrjendur og hinn almenni áhorfandi koma saman á hátíðinni í skemmtilegu og skapandi samtali sem gegnir mikilvægu hlutverki fyrir þróun og miðlun íslenskrar heimildamyndagerðar. Auk frumsýninga eru á dagskrá vinnustofur, hliðardagskrá og skemmtanahald sem setur mikinn svip á Patreksfjörð á meðan á hátíðinni varir.“

Svipmynd frá Skjaldborg á Patreksfirði.

Heimildamyndahátíðin Skjaldborg hlaut Eyrarrósina