Einnig lagt til að útbúin verði tvö hjúkrunarrými til viðbótar

Björn Bjarki Þorsteinsson, framkvæmdastjóri Brákarhlíðar í Borgarnesi, hefur sent heilbrigðisráðherra og þingmönnum kjördæmisins minnisblað um stöðu biðlista dvalar- og hjúkrunarheimila í heilbrigðisumdæmi Vesturlandis. Þar ítrekar hann, ásamt Jóni G. Guðbjörnssyni formanni stjórnar Brákarhlíðar, þá ósk stjórnenda Brákarhlíðar að þau biðrými sem falla að óbreyttu út 1. apríl næstkomandi verði gerð varanleg. „Enn fremur að tekið verði boði okkar um að útbúa tvö viðbótarrými, hjúkrunarrými, í Brákarhlíð í vannýttum opnum rýmum og nýting opinberra fjármuna þar með bætt í þágu brýnnar þjóðarþarfar,“ segir í minnisblaðinu.

Biðlistinn á Brákarhlíð taldi samtals 17 manns 12. febrúar síðastliðinn og í minnisblaðinu segir að það sé um 4,2% af íbúafjölda á starfssvæði heimilisins, þó heimilisfólk komi vissulega víðar að. „Mörgum er tíðrætt um langa biðlista höfuðborgarsvæðisins en skv. upplýsingum er hann þó töluvert fyrir innan 2% af heildaríbúafjölda höfuðborgarsvæðisins. Rétt er einnig að benda á að þjónustustig varðandi t.d. heimahjúkrun er mun hærra á höfuðborgarsvæðinu heldur en það er á starfssvæði Brákarhlíðar, ekki er um þjónustu að ræða heim fyrir utan dagvinnutíma eða um helgar né á „rauðum“ dögum nema um alger bráðatilvik sé að ræða,“ segir í minnisblaðinu. „Við óskum liðsinnis heilbrigðisráðherra og alþingismanna NV-kjördæmis í þá veru að þessi tillaga okkar verði rædd af alvöru og helst afgreidd sem allra, allra fyrst þannig að óvissunni um þessi tvö biðrými verði eytt hið snarasta sem og að framkvæmdir geti hafist við hin tvö rýmin þannig að með haustinu verði hægt að taka þau í notkun,“ segir í minnisblaðinu sem Bjarki og Jón skrifa undir.

Vilja að biðrými verði gerð varanleg