Leikskólar Borgarbyggðar koma vel út í þjónustukönnun Gallup um þjónustu sveitarfélaga fyrir árið 2019. Könnunin var gerð í lok síðasta árs og byrjun þessa. Niðurstöðurnar byggja á svörum 159 íbúa Borgarbyggðar sem lentu í tæplega ellefu þúsund manna tilviljunarúrtaki íbúa 20 stærstu sveitarfélaga landsins.

Heilt yfir sögðust 77% svarenda vera ánægðir með Borgarbyggð sem stað til að búa á, en aðeins 7% kváðust óánægðir. Einkum mælist mikil ánægja með leikskóla sveitarfélagsins, en 81% sögðust ánægð með hana; 48% frekar ánægð og 33% mjög ánægð. Aðeins 4% sögðust óánægð með þá þjónustu. Skipa þessar niðurstöður leikskólum Borgarbyggðar í fjórða sæti á landsvísu, að því er fram kemur í frétt á vef sveitarfélagsins.

Ánægja íbúa Borgarbyggðar með gæði umhverfisins í nágrenni heimilis síns mældist einnig mikil, eða 75% á meðan 13% voru óánægð en 12% hlutlaus. 60% voru ánægð með þjónustu grunnskólanna en 20% óánægð og jafn hátt hlutfall hlutlaust. 63% voru ánægð með aðstöðu til íþróttaiðkunar en 27% óánægð. Ánægja mælist með þjónustu við eldri borgara í sveitarfélaginu, en 61% svarenda kváðust ánægðir með hana en 11% óánægðir. Þá sögðust 55% íbúa ánægðir með þjónustu tengda sorphirðu en 29% óánægð. 59% voru ánægð með þjónustu við barnafjölskyldur, 27% hlutlaus í afstöðu sinni en 14% óánægð með þjónustuna. 48% sögðust ánægð með hvernig sveitarfélagið sinnir menningarmálum, 13% óánægð en 39% hlutlaus í afstöðu sinni. Þegar spurt var um þjónustu við fatlað fólk sögðust 43% ánægð með þjónustuna, 19% óánægð en 38% svarenda kváðust hlutlausir í afstöðu sinni.

Þegar kemur að skipulagsmálum kváðust 50% íbúa Borgarbyggðar sem svöruðu könnuninni óánægðir með skipulagsmál almennt í sveitarfélaginu; 27% frekar óánægður en 23% mjög óánægður. Aðeins 18% svarenda sögðust vera ánægðir með skipulagsmálin. Hefur óánægjan þó minnkað marktækt frá síðasta ári og er þetta eini flokkurinn þar sem marktækur munur mælist á viðhorfi íbúa Borgarbyggðar milli ára.

Alls sögðust 67% svarenda hafa haft samskipti við sveitarstjórnarskrifstofur Borgarbyggðar undanfarin tvö ár. Meirihluti þeirra, eða 57%, fannst starfsfólk sveitarfélagsins hafa leyst vel úr erindi þeirra, 28% illa en 15% hvorki vel né illa.

Mikil ánægja með leikskólana en óánægja með skipulagsmál