Mikill viðbúnaður er vegna mjög djúprar lægðar sem nú nálgast landið úr suðvestri. Skellur hún á sunnanverðu landinu seint í kvöld. Veðrið um vestanvert landið verður verst í fyrramálið og fram yfir hádegi. Almannavarnir ríkislögreglustjóra hafa lýst yfir óvissustigi um allt land. Ákvörðunin er tekin eftir hádegi í dag, í samráði við alla lögreglustjóra landsins, og í samræmi við veðurspá Veðurstofu Íslands. Óvissustigi er lýst yfir þegar grunur vaknar um að eitthvað geti gerst af náttúru- eða mannavöldum, sem á síðari stigum gæti leitt til þess að heilsu og öryggi fólks, umhverfis eða byggðar er ógnað. Samráð á milli almannavarna og þeirra stofnana sem málið varðar er aukið. Spáin er afar slæm og hefur Veðurstofa Íslands gefið út appelsínugula viðvörun fyrir landið allt. Veðrið verður að líkindum verst í Vestmannaeyjum. Lögreglan þar biðlar til bæjarbúa, eigenda fyrirtækja og annarra sem staddir eru í Eyjum að taka veðurspána alvarlega, koma lausamunum utandyra í skjól og fara yfir húseignir með tilliti til þess hvað geti farið af stað í óveðrinu.

Gera má ráð fyrir víðtækum áfrifum veðursins á morgun; truflunum á samgöngum á lofti og landi, rafmagnsleysi vegna ísingar auk þess sem búast má við foktjóni. Fólk er hvatt til að taka mark á viðvörunum og vera ekki á ferðinni að nauðsynjalausu. Búast má við lokunum skóla og annarrar starfsemi.

Landsnet býst við hinu versta

Ákveðið var á fundi neyðarstjórnar Landsnets í morgun að lýsa yfir óvissuástandi vegna óveðursins sem spáð er á öllu landinu á morgun. Allar viðbragðsáætlanir hafa verið virkjaðar og hætta er á margháttuðum truflunum í flutningskerfi raforku vegna aftaka vinds af austri, þar sem ísing og selta geta einnig komið við sögu, segir í tilkynningu frá Landsneti. Hætta er á truflunum á Suður-, Suðaustur- og Vesturlandi snemma í fyrramálið og fram yfir hádegi. Undir hádegi verður mikið vindálag á línum á Norður- og Austurlandi og á Vestfjörðum.

Aftakaveðri spáð í nótt og á morgun – óvissustigi lýst yfir