Laugardaginn 14. mars næstkomandi ætlar Rótarýklúbbur Borgarness að standa fyrir fyrirtækjakynningu í Hjálmakletti í Borgarnesi. Þetta er í þriðja skipti sem klúbburinn stendur fyrir slíkri kynningu en þær hafa áður verið haldnar 2012 og 2014. Að sögn Margrétar Vagnsdóttur forseta klúbbsins er markmiðið með verkefninu að gefa öllum rekstraraðilum á starfssvæðinu tækifæri til að kynna starfsemi sína á heimavettvangi og vekja um leið athygli samfélagsins á viðkomandi starfsemi. Þetta er ekki síður hugsað til þess að efla samstöðu rekstraraðila á heimavettvangi. Dreifibréf hefur nú verið sent á skráð fyrirtæki í Borgarbyggð, en Margrét vekur athygli á að ekki sé tryggt að öll fyrirtæki séu á þeim lista sem klúbburinn hefur undir höndum. Engu að síður eru öll fyrirtæki, líka þau sem skráð eru á kennitölu eigenda, velkomin til þátttöku.

„Skipulag kynningarinnar verður með þeim hætti að fyrirtækin leigja rými undir starfsemi sína og leggja sjálf til allt kynningarefni sem í boði verður. Kostnaði við þátttöku verður stillt í hóf, minnstu rýmin verða leigð á 10.000 krónur, miðrýmin á 20.000 krónur og þau stærstu á 40 þúsund krónur. Uppsetning kynningarefnis fer fram í Hjálmakletti föstudaginn 13. mars, en við munum kynna allar nánari upplýsingar þegar nær dregur og ljóst er hversu mörg fyrirtæki skrá þátttöku sína,“ segir Margrét.

Stefnt er að því að halda málstofu áður en kynningar á Fyrirtækjadeginum hefjast og verður hún sömuleiðis kynnt síðar. Rótarýklúbburinn mun svo sjá um allar auglýsingar vegna þessa m.a. í Íbúanum og Skessuhorni.

Rótaryklúbburinn leitar nú til fyrirtækja á starfssvæðinu um þátttöku í þessu verkefni. Unnt er að skrá þátttöku með því að senda tölvupóst á margretv@bifrost.is eða magnusfjeldsted73@gmail.com Skráningu lýkur 29. febrúar nk.

Rótarýklúbburinn stefnir á fyrirtækjadag í Borgarbyggð