Fram kemur í fjölmiðlum í dag að starfsfólk álversins í Straumsvík í Hafnarfirði var boðað til starfsmannafundar í morgun. Rio Tinto, sem á og rekur álverið, hyggst hefja sérstaka endurskoðun á starfsemi álversins til að meta rekstrarhæfi þess til frambúðar og leita leiða til að bæta samkeppnisstöðu þess. Dregið var úr framleiðslunni á síðasta ári um 15% og fyrir liggur að samfellt tap hefur verið á rekstri undanfarin tíu ár, eða allt frá því að Landsvirkjun endurskoðaði verð á raforku til fyrirtækisins 2010.

Vilhjálmur Birgisson formaður Verkalýðsfélags Akraness færir þessi mál í tal í pistli sem hann ritar á Facebook síðu sína í morgun. Hann segir m.a.: „Nú er allt sem ég hef bent á undanfarin ár að teiknast upp og verða að raunveruleika. Ég hef skrifað margar greinar um að með græðgisvæðingu sinni sé Landsvirkjun að slátra orkusæknum iðnaði á Íslandi og setja lífsviðurværi þúsunda fjölskyldna sem byggja afkomu sína í fullkomið uppnám.“ Bendir Vilhjálmur á að álverið í Straumsvík hafi skilað samfelldu tapi frá 2010 sem nemur um 16 milljörðum króna til ársins 2018. Áætla má að tapið fyrir árið 2019 sé á bilinu 5 til 10 milljarðar. „Það er einnig rétt að upplýsa að Rio Tinto á einnig álver í Kanada og í dag er raforkuverðið í Kanada um 50% lægra en álverið í Straumsvík er að greiða. Eru menn svo hissa á að verið sé skoða möguleika á að loka álverinu í Straumsvík,“ spyr Vilhjálmur. „Það mun valda atvinnumissi að minnsta kosti 500 manna og töpuðum útflutningstekjum sem nemur um og yfir 60 milljörðum.“

Raforkuhækkunin meiri en öll auðlindagjöld

Og Vilhjálmur heldur áfram. „Það er ekki bara að álverið í Straumsvík sé í hættu, heldur einnig Elkem Ísland á Grundartanga en eins og ég hef fjallað um þá náði Landsvirkjun að knýja fram stórhækkun á raforkuverði til fyrirtækisins í fyrra, en sú hækkun nemur um eða yfir 1,3 milljarði króna á ári. Forstjóri Elkem hefur tilkynnt róttækan niðurskurð m.a. með fækkun starfsmanna og einnig sagt að framtíð fyrirtækisins ráðist á næstu 12 til 14 mánuðum.“ Þá rifjar Vilhjálmur upp að í skjóli einokunar Landsvirkjunar hafi Landsvirkjun náð að knýja fram gríðarlega hækkun á raforkuverði til Norðuráls sem tók gildi 1. nóvember 2019 og nemur sú hækkun fjórum milljörðum á ári. „Samtals er verið að hækka raforkuverð hjá fyrirtækjum þar sem mínir félagsmenn starfa hjá á Grundartanga um 5,3 milljarða sem er meira en öll auðlindagjöld í sjávarútvegi,“ bendir Vilhjálmur á.

Blikur á lofti í rekstri orkufrekrar stóriðju hér á landi