Hátíðarhöld í Borgarbyggð í dag

Óhætt er að segja að Dagur leikskólans sé með ólíku sniði í dag, 6. febrúar. Þennan dag fyrir réttum sjötíu árum stofnuðu frumkvöðlar leikskólakennara sín fyrstu samtök. En nú ber skugga á á höfuðborgarsvæðinu. Leikskólafólk í Reykjavík verður í verkfalli í allan dag, en það er liður í kjarabaráttu félagsmanna í Eflingu og Reykjavíkurborgar. Víða annarsstaðar á landinu er hins vegar haldið upp á hátíðisdaginn. Sem dæmi er Dagur leikskólans haldinn hátíðlegur með fjölbreyttu sniði í leikskólum Borgarbyggðar í dag. Munu leikskólakennarar, stjórnendur leikskólanna og starfsfólk halda upp á daginn með margvíslegum hætti, eins og fram kemur í tilkynningu frá Borgarbyggð:

Í Andabæ verður foreldrum og vinum boðið í kaffihús milli 08:00 og 10:00 í sal leikskólans þar sem börnin ætla að undirbúa veitingar og skreyta salinn. Þá verður einnig opið inn á deildir og gestum boðið að taka þátt í skólastarfinu.

Á Hnoðrabóli verður opið hús frá kl. 15:00-16:00. Börnin og starfsfólk leikskólans ætla að bjóða gestum á myndlistasýningu sem og að taka þátt í myndlistaverkefni þar sem allskonar efniviður verður í boði til að búa til listaverk þar sem hugmyndaflugið fær að ráða för. Gestum er einnig boðið upp á kaffi og kleinur.

Í Hraunborg hafa börnin teiknað fjölskyldu-, sjálfs- og vináttumyndir sem verða til sýnis fyrir foreldra á morgun.

Í Klettaborg verður foreldrum boðið í morgunkaffi kl. 08:00 – 09:00. Í Hyrnutorgi verður leiðtogasýning þar sem myndir og fleiri verk eftir börnin verða til sýnis næstu tvær vikurnar. Skólinn hvetur alla til að fara og sjá þessi flott verk leiðtoga framtíðarinnar.

Í Uglukletti var haldinn barnafundur fyrir ekki svo löngu þar sem dagur leikskólans var á dagskrá. Á fundinum var börnunum sagt frá deginum og útskýrt hvers vegna hann væri haldinn hátíðlegur. Börnin voru spurð hvað þeim mundi finnast gaman að gera í tilefni dagsins og hvernig hægt væri að kynna fyrir öðrum hvað fer fram innan leikskólans. Alls kyns hugmyndir spruttu fram, meðal annars kom sú hugmynd að senda myndir af leikskólanum svo allir sjái og búa til bók um leikskólann. Ákveðið var að framkvæma þessa hugmynd og byrja þá vinnu á degi leikskólans og sjá hvert hún leiðir. Það verður svo opið hús yfir daginn í tilefni dagsins og gestum boðið að kynna sér starfið í leikskólanum og eiga glaðar stundir með starfsmönnum skólans og börnum.

Sjötíu ár frá því leikskólakennarar stofnuðu samtök sín