Á morgun, laugardaginn 1. febrúar, verða 90 ár liðin síðan Kvenfélagasamband Íslands var stofnað. Félagið er samstarfsvettvangur og málsvari kvenfélaganna í landinu og er fjölmennasta kvennahreyfingin á Íslandi sem starfar á landsvísu. Innan félagsins eru 17 héraðssambönd með 154 kvenfélög sem telja um 5000 félagskonur. Kvenfélögin hafa gegnt því hlutverki í gegnum árin að safna peningum til góðra málefna og í tilefni afmælisins ætla kvenfélög um allt land að standa fyrir sameiginlegri söfnun. Safnað verður fyrir tækjum og hugbúnaði honum tengdum, sem mun gagnast konum um allt land. Um er að ræða mónitora og ómtæki og rafrænar tengingar milli landsbyggðar og Landspítalans. „Þessi tæki munu sérstaklega gagnast konum á landsbyggðinni en með tilkomu þeirra geta konur farið í skoðun hjá lækni í sinni heimabyggð og sérfræðingur í Reykjavík getur fylgst með á hinum enda línunnar. Konur þurfa því ekki að ferðast um langan veg til að hitta sérfræðilækna,“ segir Linda B. Sverrisdóttir, nefndarkona í afmælisnefnd KÍ og meðlimur í Kvenfélagi Borgarness í samtali við Skessuhorn.

Selja armbönd og súkkulaði

Safnað verður fyrir tækjunum með sölu á armböndum og súkkulaði. Hvert kvenfélag ákveður hvernig sölunni verður háttað, hvort konurnar gangi í hús, selji á viðburðum eins og bæjarhátíðum eða með öðrum hætti. „Það er konum í kvenfélögunum alveg frjálst hvernig þær selji vörurnar en í Borgarnesi þykir mér líklegt að við verðum með sölu á viðburðum eins og 17. júní og Brákarhátíð. Svo er hugmyndin að láta þetta bara berast konu frá konu,“ segir Linda. Fjáröflunin mun standa yfir í heilt ár og 1. febrúar á næsta ári er áætlað að afhenda gjafirnar. Þá eru ýmsir viðburðir í vinnslu á afmælisárinu og verða þeir auglýstir nánar þegar líður að þeim.

Sá ekki fyrir sér að vera í kvenfélagi

Linda er búin að búa í Borgarnesi í fjögur ár og fyrir tveimur og hálfu ári ákvað hún að ganga í kvenfélagið. „Ég hafði aldrei séð fyrir mér að gerast meðlimur í kvenfélagi og detta svona ægilega inn í þetta, en mikið er þetta skemmtilegt,“ segir Linda. „Við í kvenfélaginu hér í Borgarnesi stöndum fyrir viðburðum á 17. júní og Brákarhátíð, þar sem við erum með vöfflusölu og bröns. Þá söfnum við fyrir skólann, Brákarhlíð eða öðrum góðum málefnum. Kvenfélögin hér í Borgarbyggð hafa líka tekið höndum saman og safnað fyrir Heilbrigðisstofnun Vesturlands og það er rosalega skemmtilegt og gefandi að taka þátt í slíku,“ segir Linda.

Eins og fyrr segir á Kvenfélagasamband Íslands afmæli næstkomandi laugardag og verður deginum fagnað á Bessastöðum. Þar ætlar Guðni Th. Jóhannesson forseti Íslands að taka á móti kvenfélagskonum í afmælisnefnd KÍ, stjórnarkonum og fyrrum forsetum KÍ og söfnuninni verður þá formlega ýtt úr vör.

Linda B. Sverrisdóttir nefndarkona í afmælisnefnd KÍ og meðlimur í Kvenfélagi Borgarness.

Kvenfélagskonur safna á afmælisári fyrir búnaði sem gagnast um allt land