Agnes M. Sigurðardóttir, biskup Íslands, hóf vísitasíu sína í Vesturlandsprófastsdæmi með heimsókn í grunnskólann í gærmorgun. Með henni í för eru Þorbjörn Hlynur Árnason prófastur Vesturlandsprófastsdæmis og Þorvaldur Víðisson biskupsritari. Gestirnir skoðuðu skólann í fylgd skólastjórnenda og heilsuðu upp á nemendur og kennara. Auk þess fræddust þeir um uppbyggingarstefnuna og velferðarkennsluna sem sett hefur mark sitt á skólastarfið. Eftir hádegið var guðsþjónusta í Brákarhlíð í Borgarnesi og í gærkvöldi predikaði biskup í messu í Borgarneskirkju. Í dag hófst svo dagskráin með heimsókn í Akrakirkju, síðan í Álftártungukirkju klukkan 14 í dag og Álftaneskirkju klukkan 16.

Vísitasía biskups heldur svo áfram á sunnudaginn með heimsókn í hið nýja Garða- og Saurbæjarprestakall. Biskup mun þar heimsækja allar kirkju prestakallsins; Akraneskirkju, Leirárkirkju og Hallgrímskirkju í Saurbæ sunnudaginn 2. febrúar og Innra-Hólmskirkju mánudaginn 3. febrúar. Í ferð sinni á mánudaginn mun biskup einnig heimsækja Dvalarheimilið Höfða og Fjöliðjuna á Akranesi. Að sögn séra Þráins Haraldssonar sóknarprests mun biskup skoða kirkjurnar og ræða við presta og sóknarnefndir um starfið í þeim. Þetta er fyrsta vísitasía biskups í hinu nýja sameinaða prestakalli, en biskup Íslands vísiteraði prestaköllin síðast árið 2002. Hátíðarmessa verður í Akraneskirkju sunnudaginn 2. febrúar kl. 11. Biskup predikar og prestar prestakallsins þjóna fyrir altari. Þessi messa er sameiginleg fyrir allt prestakallið. Þráinn Haraldsson sóknarprestur hvetur íbúa í prestakallinu til að fjölmenna í kirkju þennan dag.

Þetta var fyrsta vísitasía biskups Íslands í nýju Vesturlandsprófastsdæmi frá 2010, þegar Borgarfjarðarprófastsdæmi og Snæfellsness- og Dalaprófastsdæmi voru sameinuð í eitt. Tilgangur biskupsvísitasíu er að heimsækja söfnuði landsins, skoða kirkjur, kirkjugarða, muni og eignir kirknanna. Biskup tekur í heimsóknum sínum þátt í helgihaldi, heimsækir stofnanir í prestaköllunum og fundar auk þess með prestum og sóknarnefndum um helgihald og trúarlíf.

Vísitasía biskups hófst á fimmtudaginn í Grunnskólanum í Borgarnesi þar sem þessi mynd var tekin. Ljósm. ÞV.

Björn Bjarki Þorsteinsson framkvæmdastjóri á Brákarhlíð bætti heldur betur í reynslubankann þegar hann hjálpaði til við að skrýða prófast fyrir messu í Brákarhlíð á fimmtudaginn. Ljósm. Vignir Sigurþórsson.

Biskup á ferð og flugi um prófastsdæmið