Skógarþröstur. Ljósm. Sindri Skúlason.

Árleg fuglatalning verður um næstu helgi

Árleg garðfuglahelgi Fuglaverndar verður dagana 24. – 27. janúar næstkomandi. Framkvæmd athugunarinnar er einföld, segir í tilkynningu frá Fuglavernd. Fólk skal velja stund og stað og það þarf einungis að fylgjast með garði í einn klukkutíma einhvern fyrrgreindra daga. Athugendur velja hvaða dag þeir fylgjast með garðfuglunum eftir veðri og aðstæðum. „Oft er gott að velja klukkutíma í ljósaskiptunum á morgnana, eða fyrir rökkur þegar fuglarnir eru að ná sér í forða fyrir kalda vetrarnóttina. Þátttakendur skrá hjá sér hvaða fuglar koma í garðinn og skrá mesta fjölda af hverri tegund á meðan athugunin stendur yfir. Talningin miðar við þá fugla sem eru í garðinum en ekki þá sem fljúga yfir, þú telur þá sem koma í fuglafóðrið, setjast á grein og hvíla sig. Ekki má leggja saman. Þetta er til að forðast tvítalningu á sama fuglinum, sem ef til vill kemur á 15 mínútna fresti í garðinn.“

Að lokinni athugun skal skrá niðurstöður rafrænt á vef Fuglaverndar www.fuglavernd.is Ekki þarf að vera félagi í Fuglavernd til að taka þátt, aðalatriðið er að vera með og vill Fuglavernd fá sem flesta sem fóðra fugla til þátttöku. Einnig er hægt að hlaða niður hjálparblaði talningarinnar, sem er með myndum af algengum fuglategundum og er það tilvalið fyrir börn og þá sem eru að stíga fyrstu skrefin í fuglaskoðun.

Líkar þetta

Fleiri fréttir