Verðlagseftirlit ASÍ hefur tekið saman breytingar á fasteignagjöldum milli áranna 2019 og 2020 í 15 fjölmennustu sveitarfélögum landsins. Breytingarnar eru reiknaðar í krónum miðað við meðal fasteigna- og lóðamat í ákveðnum hverfum hjá þeim sveitarfélögum sem voru til skoðunar en fasteignagjöld eru í flestum tilfellum lögð á miðað við fasteigna- og lóðamat. Akraneskaupstaður er eina sveitarfélagið á Vesturlandi sem tekið er til skoðunar af verðlagseftirliti ASÍ. Í samræmi við ákvörðun bæjarstjórnar síðastliðið haust er hækkun fasteignagjalda mjög hófleg enda miðaði bæjarstjórn við að halda sig innan verðbólgumarkmiða við álagningu skatta. Þrátt fyrir að fasteignamat sérbýlis á Akranesi hafi hækkað um 22,5% milli ára hækka fasteignaskattar ekki meira en 2,9% milli ára. Fasteignamat íbúða í fjölbýlishúsum hækkaði um 19,8% milli ára en fasteignaskattar hækkar einungis um 0,6% milli ára.

Víða veruleg skattahækkun

Gjöld á 100 fm íbúð í fjölbýli hækka mest á Sauðárkróki um 14,93% eða 36.991 kr. en næst mest á Egilsstöðum um 11,06% eða 29.515 krónur. Ef miðað er við 200 fm einbýli hækka gjöldin mest á Egilstöðum, 10,3% eða um 46.756 krónur og næst mest í Glerárhverfi á Akureyri um 7,7% eða 27.000 krónur. „Þessar hækkanir eru langt umfram þau loforð sem gefin voru í tengslum við lífskjarasamningana en Samband íslenskra sveitarfélaga lýsti stuðningi við þau með tilmælum til sveitarfélaga um að gjaldskrárhækkanir vegna ársins 2020 yrðu ekki umfram 2,5%,“ segir í tilkynningu ASÍ.

Fasteignagjöldin lækkuðu mest í Keflavík sé miðað við 100 fm fjölbýli, mínus 9,61% eða 28.722 kr. og næst mest í Njarðvík. Sé miðað við 200 fm einbýli lækkuðu fasteignagjöldin mest á Ísafirði, eða mínus 9,3% eða um 38.969 kr. og næst mest í Njarðvík, -4,4% eða um 24.364 kr.

Tafla sem sýnir breytingu fasteignagjalda og -skatta milli ára í 15 stærstu sveitarfélögum landsins. Heimild: ASÍ.

Þrátt fyrir mikla hækkun fasteignamats er hófleg hækkun skatta á Akranesi