Þrátt fyrir mjög slæmt veður víða í landshlutanum undanfarna viku segir Lögreglan á Vesturlandi allt of mikið um hraðakstur í umdæminu, sérstaklega í ljósi þess að akstursskilyrði voru oft slæm. Lögregla hefur fylgst náið með umferð undanfarna viku og mun það halda áfram um umdæmið allt næstu misserin.

Þriðjudaginn 7. janúar var myndavélabifreið lögreglu a Innnesvegi við Akraneshöll. Milli 12:30 og 13:30 voru hraðamæld 62 ökutæki og 13 ökumenn voru kærðir fyrir of hraðan akstur. Sá sem hraðast var á 57 km/klst. og meðalhraði brota var 50,25 km/klst. Hámarkshraði á kaflanum er 30 km/klst., en meðalhraði allra var 32 km/klst.

Síðastliðinn miðvikudagsmorgun, milli 7:35 og 8:35, vaktaði lögregla umferð við Ketilsflöt á Akranesi, til móts við leikskólann Akrasel, þar sem hámarkshraði er einnig 30 km/klst. Átta voru kærðir fyrir of hraðan akstur og meðalhraði brota var 42 km/klst. Á fimmtudag milli 8:00 og 9:00 var Skarðsbraut á Akranesi vöktuð við leikskólann Vallarsel. Hraði 40 bifreiða var mældur og einn kærður fyrir að aka á 39 km/klst.

Á laugardagsmorgun var umferð vöktuð á Akrafjallsvegi við Másstaði. 45 bílar voru hraðamældir og sá sem hraðast ók var á 103 km/klst., þar sem hámarkshraði er 90 km/klst. Um hádegisbilið sama dag var umferð um Garðabraut á Akranesi vöktuð. Á hálfri klukkustund voru 67 ökutæki hraðamæld og virtist allt vera meira og minna í lagi þar, að sögn lögreglu. Meðalhraði ökutækjanna var 51 km/klst. þar sem leyfilegur hámarkshraði er 50 km/klst.

Myndavélabíll lögreglu hefur verið á Akranesi og nágrenni undanfarna viku, en lögregla áréttar að hann fari um allt umdæmið. Honum kemur lögregla fyrir á stöðum sem metnir eru viðkvæmir, þar sem fólk ætti að sýna sérstaka aðgæslu, svo sem við skóla og leikskóla, gangbrautir og gatnamót.

Hraðakstur þrátt fyrir vont veður og slæm skilyrði