medium

large

thumbnail

1536x1536

2048x2048

small

custom-size

Grásleppusjómenn fagna lengingu veiðitímabilsins – myndasyrpa

Hlynur Blær gefur bílum nýjan blæ

Brúin komin á sinn stað yfir Berjadalsá

ÞB Borg reisir glæsihýsi í Stykkishólmi

Brást illa við afskiptum lögreglu

Fjölmenningarskóli Vesturlands tekinn til starfa

core/freeform

Félagar í Björgunarsveitinni Brák í Borgarnesi samþykktu á félagsfundi sínum í gærkveldi áskorun sem þeir hafa sent til allra þingmanna í Norðvesturkjördæmi. Í henni eru þingmenn hvattir til að beita sér fyrir því að tekið verði að nýju upp þingmál númer 136 frá 149. löggjafarþinginu, frumvarp sem heimilar endurgreiðslur til félagasamtaka til almannaheilla vegna mannvirkjagerðar og annarra framkvæmda. Fyrsti flutningsmaður frumvarpsins var Jón Gunnarsson þingmaður Sjálfstæðisflokksins auk 12 meðflutningsmanna. Frumvarp Jóns dagaði uppi á þingi síðastliðið vor m.a. vegna málþófs sem hafði áhrif á fjölmörg þingmál.

Samkvæmt frumvarpi Jóns Gunnarssonar verður ríkinu gert heimilt að endurgreiða félagasamtökum á borð við björgunarsveitir fjárhæð sem nemur virðisaukaskatti sem þær hafa greitt vegna mannvirkjagerðar og annarra framkvæmda sem miða að því að efla starfsemi eða bæta aðstöðu almannaheillasamtaka eins og björgunarsveitirnar eru skýrt dæmi um. „Það er kunnara en frá þurfi að segja hver nauðsyn íslensku þjóðinni er að hafa sterkar og öflugar björgunarsveitir til að sjá um eða aðstoða við ýmis verkefni þegar á bjátar. Nægir þar að taka til örfá nýleg dæmi, svo sem vinnu björgunarsveita á Norðurlandi að mörgum og margvíslegum verkefnum vegna ofviðris í desember, áþekk verkefni á Suðurnesjum um síðustu helgi, leitir að týndum einstaklingum við Vík og í Hnappadal á síðustu vikum og nú síðast björgun 39 ferðamanna af Kili í umfangsmikilli aðgerð. Aukinheldur má minna á að þjóðin þekkir þessa nauðsyn og virðir hana og björgunarsveitirnar með því að hjá fleiri en einum fjölmiðli voru sveitirnar valdar „maður ársins 2019“ í lok síðasta árs.“

<strong>Fresta framkvæmdum þar til málin skýrast</strong>

Þá segir í ályktun Brákar í Borgarnesi að í umræðum um björgunarsveitirnar er iðulega komið að fjármögnun þeirra, ekki síst upp á síðkastið þegar horfur eru á að þrengi verulega að fjáröflun sem verið hefur aðal tekjulind þeirra. „Björgunarsveitin Brák er að hefja framkvæmdir við byggingu nýs húss undir starfsemina þar sem eldra húsnæði er á ýmsan hátt óhentugt. Á síðasta ári voru 70 ár síðan skipuleg björgunarstarfsemi hófst í Borgarnesi og þá var tekin fyrsta skóflustungan að nýja húsinu. Nú á næstu vikum stendur til að hefjast handa við framkvæmdir, jarðvinnu og sökkla. Það er augljóst mál að fámenna björgunarsveit munar verulega um það ef virðisaukaskattur fæst endurgreiddur af byggingakostnaði. Því verður framkvæmdum skotið á frest í bili í þeirri von að bréf þetta og önnur hvatning til þings og þingmanna verði til þess að ofangreint frumvarp verði að lögum sem allra fyrst, í síðasta lagi fyrir vorið, og Björgunarsveitin Brák fái notið þeirrar ívilnunar sem í lögunum mun felast,“ segir í niðurlagi bréfs Björgunarsveitarinnar Brákar til þingmanna.

Skora á þingmenn að styrkja björgunarsveitir um virðisaukaskatt af mannvirkjagerð