Hópurinn saman kominn í Sögumiðstöðinni. Ljósm. Grundarfjarðarbær.

Nýir Grundfirðingar boðnir velkomnir

Á Gamlársdag fögnuðum Grundfirðingar börnum ársins 2019. Allt frá árinu 2006 hafa nýfædd börn í Grundarfirði verið boðin velkomin í heiminn með gjöfum frá sveitungum sínum. Það er Grundarfjarðarbær í samstarfi við Leikskólann Sólvelli, Heilbrigðisstofnun Vesturlands í Grundarfirði og Slysavarnadeildina Snæbjörgu sem stendur að þessum viðburði. Hverju barni eru færð að gjöf hagnýtur fatnaður, tannbursti, bækur og bæklingur frá leikskólanum, auk þess sem með fylgja endurskinsmerki og leiðbeiningar til foreldra, t.d. gátlisti um öryggi barna á heimili. Haldið var samsæti í Sögumiðstöðinni fyrir börn ársins og fjölskyldur þeirra, en í árslok búa 16 börn í Grundarfirði fædd á árinu, sjö drengir og níu stúlkur. Börn ársins 2018 voru tíu talsins, en þó hefur fjölgað og nú eru í þeim árgangi 14 börn. Grundfirðingum er því að fjölga.

Gjöfin hefur verið kölluð „sængurgjöf samfélagsins“ og er hluti af fjölskyldustefnu Grundfirðinga, sem sett var 2006. Hugmyndin átti þá rætur sínar að rekja til Finnlands, þar sem tíðkast hafði að gefa börnum hagnýtar gjafir í kassa sem mátti síðan breyta í vöggu.

„Í okkar litlu samfélögum skiptir hver einstaklingur miklu máli. Þetta er sú leið sem okkar samfélag fer til að bjóða nýjustu íbúana sérstaklega velkomna. Það þarf nefnilega heilt þorp til að ala upp barn. Þannig er þetta líka hugsað til að minna okkur öll á gildi þess að hlúa hvert að öðru, ekki síst börnunum, til að rækta gott samfélag,” segir Björg Ágústsdóttir bæjarstjóri.

Líkar þetta

Fleiri fréttir