Byggðarráð Dalabyggðar samþykkti á fundi sínum 19. desember síðastliðinn bókun þar sem harmað er það ástand sem skapaðist í óveðrinu í desember. Það leiddi í ljós alvarlega galla í innviðum samfélagsins. „Ljóst er að innviðir flutningskerfis raforku brugðust. Þó að veðurhamurinn væri ekki jafn mikill í Dalabyggð og hjá nágrönnum okkar skapaðist samt ástand sem ekki er boðlegt í nútíma samfélagi,“ segir í bókun byggðarráðs.

„Vegna bilana í tengivirkinu í Hrútatungu voru miklar truflanir á rafmagni í Dalabyggð. Varaafl er af mjög skornum skammti í Dölunum, og oft er reynt að keyra afl á Skógarstrandarlínu, sem er að verða 70 ára gömul sveitalína sem flytur lítið brot af því sem þarf. Varaaflsstöðin í Búðardal nær ekki að halda ragmagni á öllu þéttbýlinu og ekki er tryggð nægileg orka fyrir mikilvæga atvinnustarfsemi eins og Mjólkursamlagið í Búðardal sem hefur valdið stórtjóni, bæði núna og á undanförnum árum. Skammta þurfti rafmagn í Búðardal þar sem þurft hefði að láta Dvalar- og hjúkrunarheimilið Silfurtún hafa forgang.“

Þá segir í bókuninni að hluti Dalabyggðar hafi verið án rafmagns í 22 tíma en slíkt skapar alvarlegt ástand fyrir mjólkurframleiðendur auk þess sem fjarskipti lágu niðri vegna rafmagnsleysis. „Lífsspursmál er að íbúar sveitarfélagsins geti náð í viðbragðsaðila ef alvarleg slys eða veikindi ber að höndum. Flutningskerfi rafmagns í Dalabyggð er víða orðið gamalt og ljóst er að hefði veðrið orðið verra hefði það ekki þolað álagið. Þetta undirstrikar mikilvægi þess að kraftur sé settur í uppbyggingu þess með því að leggja línur í jörð og þá um leið að tryggja aðgang að þriggja fasa rafmagni. Við búum í nútíma samfélagi sem reiðir sig á rafmagn og fjarskipti. Stöðug fjarskipti er spurning um almannaöryggi, það öryggi brást. Það er ekki í boði að hafa ekki öruggt fjarskiptasamband, hvernig sem viðrar, sama hvar maður er staddur. Byggðarráð Dalabyggðar krefst þess að þegar verði hafist handa við að endurbæta flutningskerfi raforku til sveitarfélagsins og dreifikerfið innan þess og ekki síður að koma upp varaafli. Starfsmenn RARIK, Landsnets, sjálfboðaliðar og margir fleiri unnu þrekvirki við að bregðast við því alvarlega ástandi sem skapaðist og eiga miklar þakkir skildar. Innviðirnir brugðust hins vegar,“ segir að endingu í bókun byggðarráðs Dalabyggðar.

Alvarlegir gallar í innviðum komu í ljós í óveðrinu