Aukin samkeppni er við stóru bakaríin og innfluttar brauðvörur. Hér koma nýbökuð formbrauð úr mótunum. Ljósm. af.

Vill selja Brauðgerð Ólafsvíkur – er einn eftir í fyrirtækinu

Jón Þór Lúðvíksson bakarameistari í Ólafsvík, sem rekið hefur Brauðgerð Ólafsvíkur undanfarinn áratug en starfað þar í fjóra áratugi. Hann hefur nú ákveðið að selja brauðgerðina vegna erfiðs rekstrar. Fyrirtækið hvílir á gömlum merg, var stofnað árið 1951. Í samtali við Skessuhorn segir Jón Þór að hann hafi nýlega sagt öllu starfsfólki sínu upp og er nú einn að vinna. „Ég ætla að halda áfram þangað til ég get selt þar sem það kostar að reka þetta húsnæði. Ég ætla að halda áfram á meðan heilsan leyfir en það tekur alltaf einhvern tíma að selja svona fyrirtæki. Aðal ástæðan fyrir því að vilja selja er heilsuleysi okkar hjónanna og minnkandi sala sem rekja má til aukinnar samkeppni við stóru bakaríin og innfluttar brauðvörur. Ef þú horfir í hillurnar í búðunum sérð þú að við erum bara með lítið horn þar og hillurnar fullar af innfluttum og aðfluttum brauðvörum. Þá er ekki hægt að líta framhjá því að orkukostnaður hefur hækkað mikið og ekki síður hefur orðið gríðarleg hækkun launatengdra gjalda. Þetta leggst allt á eitt að gerir reksturinn erfiðari.“

Jón Þór segir að þegar mest var að gera hjá honum hafi fjórtán manns verið í vinnu og allt að fjórir bakarar. Sjálfur hefur Jón Þór staðið vaktina í brauðgerðinni í 40 ár. „Þegar vertíðin var og hét voru allt að 300 til 400 manns á vertíðarbátunum og komu þá matsveinar eldsnemma á morgnanna til þess að kaupa inn fyrir daginn. Þá var oft líf í tuskunum og mikið talað, en núna eru þetta kannski þrír til fjórir matsveinar sem koma og gera innkaup í bakaríinu. Nú eru aðeins þrír endursöluaðilar eftir í öllum Snæfellsbæ sem versla við okkur. Hótel, veitingastaðir og Snæfellsbær kaupa ekkert.“

Jón Þór segir tækifæri felast í því fyrir samheldna fjölskyldu að gera eitthvað með reksturinn í húsinu. „Það er svo margt hægt að gera ef næg orka er til staðar,“ segir Jón Þór Lúðvíksson að endingu.

Líkar þetta

Fleiri fréttir