Í dag, fimmtudaginn 5. desember, verður opin aðventudagskrá í Safnahúsinu í Borgarnesi, þar sem fólki er boðið að koma við og hlýða á bóklestur. Dagskráin hefst kl. 17.00 með því að tveir höfundar lesa upp úr nýjum bókum sínum. Það eru þau Una Margrét Jónsdóttir sem les úr bók sinni Gullöld revíunnar og Þorbergur Þórsson sem les upp úr bókinni Kvöldverðarboðið.

Kl. 18.00 hefst svo árlegur upplestur Aðventu Gunnars Gunnarssonar sem fer fram með aðstoð sjálfboðaliða. Ingibjörg Jónasdóttir spinnur á rokk meðan á lestrinum stendur og er það gert í minningu Benoníu Jónsdóttur (1872-1946) sem var fædd á Gilsbakka í Hvítársíðu og bjó síðar á Vestri- Leirárgörðum. Hún var dóttir hjónanna Jóns Jónssonar og Sigurbjargar Steingrímsdóttur sem síðar bjuggu í Suddu í Reykholtsdal og fluttu til Ameríku vorið 1898. Þau hjón eru fyrirmyndir af aðal sögupersónum Böðvars Guðmundssonar í bókunum Híbýlum vindanna og Lífsins tré, sem notið hafa mikilla vinsælda. Rokkur Benóníu var nýverið gefinn til Byggðasafns Borgarfjarðar og verður til sýnis við þetta tækifæri.

Aðventa Gunnars Gunnarssonar var skrifuð á dönsku og kom fyrst út á þýsku. Hún var síðan snilldarlega þýdd á íslensku af Magnúsi Ásgeirssyni frá Reykjum í Lundarreykjadal árið 1939 og er það sú útgáfa sem verður lesin á aðventukvöldinu. Eins og kunnugt er dvaldi Gunnar langdvölum í Danmörku og skrifaði á dönsku. Halldór Kiljan Laxness segir svo í formála útgáfunnar 1939: „Gunnar markaðist aldrei einkennum útflytjandans, hins vegalausa, áttavillt og upprætta, í þessari löngu hríð, heldur vissi alltaf veðurstöðuna; hann hafði æfinlega af Íslandi bæði fugl og hval, eins og segir um farmenn í gömlum bókum…”

Eru gestir og gangandi boðnir velkomnir til að hlýða á upplesturinn og einnig að taka þátt í lestri Aðventu eftir því sem hentar, boðið verður upp á kaffi/te og smákökur. Þeir sem vilja taka þátt í lestrinum eru beðnir um að láta vita í Safnahúsi: safnahus@safnahus.is og/eða 433 7200.

Nýjar bækur kynntar og Aðventa lesin af sjálfboðaliðum