Lilja Björg tekur tímabundið við starfi sveitarstjóra

Lilja Björg Ágústsdóttir tekur tímabundið við starfi sveitarstjóra í Borgarbyggð. Þetta var samþykkt á fundi byggðarráðs í morgun. Fram kemur í tilkynningu að meirihluti byggðarráðs hafi ákveðið að ganga til samninga við Lilju Björgu, forseta sveitarstjórnar, um að gegna starfi sveitarstjóra tímabundið. „Lilja Björg mun taka við starfinu á meðan unnið er að ráðningarferli nýs sveitarstjóra. Hún mun hefja störf hjá sveitarfélaginu í desember og mun gegna starfi þar til nýr sveitarstjóri hefur verið ráðinn. Lilja Björg mun stíga til hliðar sem forseti sveitarstjórnar á meðan hún sinnir störfum sveitarstjóra. Með ráðningu Lilju er verið að tryggja samfellu í störfum sveitarfélagsins á meðan á ráðningaferli á nýjum sveitarstjóra stendur yfir. Lilja Björg er vel kunnug málefnum sveitarfélagsins og mun taka við þeim verkefnum sem voru á borði fráfarandi sveitarstjóra,“ segir í tilkynningu meirihlutans.

Lilja Björg er búsett í Borgarfirði, grunnskólakennari og lögfræðingur að mennt, og hefur starfað sem lögmaður undanfarið samhliða sveitarstjórnarstörfum. „Þessi ákvörðun verður lögð fyrir sveitarstjórn 12. desember n.k. til samþykktar,“ segir í tilkynningunni.

Lilja Björg kveðst aðspurð í samtali við Skessuhorn hlakka til að að takast á við nýja áskorun. „Ég þakka það traust sem samstarfsfólk mitt í sveitarstjórn sýnir mér með þessum ráðahag. Þetta er auðvitað tímabundin ráðstöfun meðan fundinn verður nýr sveitarstjóri. Ég hlakka til að takast á við þau fjölmörgu verkefni sem bíða og mun leggja áherslu á að sem minnst rask verði á starfsemi sveitarfélagsins meðan þetta millibilsástand varir. Ég mun sitja áfram sem fulltrúi í sveitarstjórn ásamt því að sinna starfi sveitarstjóra, en fel öðrum önnur hlutverk mín í fastanefndum sveitarfélagsins, þar til nýr sveitarstjóri tekur við,“ segir Lilja Björg.

Líkar þetta

Fleiri fréttir

Óbreyttir stýrivextir

Peningastefnunefnd Seðlabanka Íslands ákvað á miðvikudag að halda vöxtum bankans óbreyttum. Meginvextir bankans, vextir á sjö daga bundnum innlánum, jafnan... Lesa meira