Sóknaráætlun Vesturlands birt í samráðsgátt

Sóknaráætlun Vesturlands fyrir árin 2020-2024 hefur nú verið birt í samráðsgátt stjórnvalda til umsagnar til 14. nóvember nk. Um er að ræða þróunaráætlun landshlutans og felur í sér stöðumat Vesturlands, framtíðarsýn, markmið og áherslur til að ná fram þeirri framtíðarsýn. Sóknaráætlun byggir á fimm grunnþáttum; velferð, umhverfi, samgöngum, menningu og atvinnu. Þá voru allir þessir grunnþættir tengdir við heimsmarkmið Sameinuðu þjóðanna. Í áætluninni eru sett fram skýr mælanleg markmið og áherslur sem verða leiðarljós við val á áhersluverkefnum sem og við úthlutun úr Uppbyggingarsjóði Vesturlands.

Sóknaráætlunin var unnin á tímabilinu mars til október á þessu ári. Haldið var fjölmennt íbúaþing þar sem Vestlendingum gafst kostur á að koma sínum sjónarmiðum á framfæri. Samráðsvettvangur Sóknaráætlunar Vesturlands kom síðan að frekari vinnu við mótun stefnunnar, en hann skipa fulltrúar frá sveitarfélögum, atvinnulífi, menningarlífi, fræðasamfélaginu, félagasamtökum og öðrum hagsmunaaðilum.

Niðurstaða vinnunnar er framtíðarsýn, markmið og áherslur sem ætlað er að munu stuðla að frekari vexti og framgangi á Vesturlandi og gera landshlutann samkeppnishæfari og betri búsetukost.

Sjá nánar í samráðsgátt stjórnvalda. 

Líkar þetta

Fleiri fréttir